ANG Emergency Operation Center (EOC) nakatala og three digits nga kaso sa
Covid-19, human sa 17 ka adlaw nga nag-double digits lang ang mga bag-ong
kaso sa dakbayan sa Sugbo.
Base sa resulta nga gipagawas sa EOC, adunay 108 ka new cases kagahapon, Abril 14, gikan sa 1,237 ka mga indibiduwal nga gikuhaan og sample.
Ang Cebu City katapusang nag three digits niadtong Marso 26, diin ang EOC nakatala og 104 ka mga kaso sa maong virus.
Sa 17 ka mga adlaw nga kanunay nga nag-two digits ang Covid-19 cases sa dakbayan, nag-average kini 65 ka mga kaso matag-adlaw.
Si Konsehal Joel Garganera, deputy chairman sa EOC, nagkanayon nga hangtod anaa pa ang virus, dili angay mokumpyansa ang mga tawo ug ang kaso adunay panahon nga mosaka ug aduna say mokunhod.
Sa kinatibuk-an, niabot na og 22,512 ka mga kaso sa Covid cases sukad sa niaging tuig apan 20,947 na ang naulian kon 93.05% recovery rate samtang 830 ka mga tawo ang nakabsan sa ilang kinabuhi gikan sa 233,670 ka mga tawo nga nakuhaan og samples para aa Covid testing.
Sa Marso, 4,136 ang nataptan sa Covid-19 ug 64 kanila ang namatay kon 1.54% mortality rate.
Sa kasamtangan, anaa nalang sa 735 ka mga aktibong kaso kinsa padayon nga nagpaalim sa ilang balatian sa mga quarantine center, barangay isolation centers ug mga hotel. (PAC)