TULO ka dagkong mga proyektong imprastraktura ang pagatukoron sa kadalanan sa Dakbayan sa Sugbo, duha ka flyover ug usa ka underpass.
Usa ka consultation tali sa apektadong mga residente ug establisemento ning mao nga mga proyekto gipahigayon sa Department of Public Works and Highways (DPWH) 7 sa Barangay Kamagayan sa Huwebes, Abril 15, 2021 uban sa Cedco Engineers nga nipahigayon og detailed engineering design.
Ang unang flyover manukad sa Osmena Blvd. eskina N. Bacalso Avenue-lagbas sa P. del Rosario St. ug Leon Kilat St. Kini dunay gitas-on nga 1,140 metros.
Ang ikaduha molagbas gikan sa N. Bacalso Avenue, eskina V. Rama nga dunay gitas-ong 1,265 metros.
Ang wa mahisgoti atol sa konsultasyon mao ang underpass nga motadlas sa karsada sa Mambaling padung sa South Road Properies (SRP) nga mosangko sa Cebu South Coastal Road (CSCR).
Ang DED sa tulo ka mga proyekto gigastuhan og P105 milyunes. Niisyu ang DPWH 7 og notice to proceed alang sa Cedco niadtong Disyembre 14, 2020 ug walo ka buwan ang paghimo sa detailed engineering design.
Si Leah Negre, representative sa Cedco Engineers, nagkanayon nga palapdan sa DPWH 7 ang karsada diin tukoron ang duha ka flyovers.
Si Negre nagkanayon nga palapdan og 2.5 metros gikan sa kilid sa karsada alang sa road widening, diin ang mga yuta bayran kon pilay iyang kasamtangan nga market value, dili ang zonal value.
Ang mga tag-iya og establisemento ug stakeholders wala na nipadangat sa ilang daghang mga concern bahin sa proyekto.
Igo ra silang nangutana kon unsa kalapad ang road widening ug pila ang bayad sa propiyedad nga maapektohan.
Ang Cedco Engineers niingon nga kadtong mga building nga maapektohan ang 20 percent lapas pa sa ilang area, bayaran sa 100 porsyento base sa kasamtangan nga market value sa ilang propiyedad.
Kadtong ubos ra sa 20 porsyento tukma ra usab sa damage ang ilang madawat nga bayad.
Si Joshua Monsanto sa DPWH 7 nagkanayon nga nagsugod pa lang sila sa primerong lakang alang sa katukoran sa proyekto ug wala pa ang pagtrabaho sa flyover ug underpass aron ilang mabanabana kon pila ang magasto sa DPWH labi na sa pagpalit sa mga yuta, bayad sa establisemento nga apektado ug uban pa.
Wa usab mobutyag si Monsanto kon pila ang gipundo nga gahin sa DPWH 7 para sa road widening ug pila ang magasto sa gobyerno sa tulo ka dagkong proyekto. Ang mga barangay kapitan sa Kalubihan ug San Antonio nga silang Rex Milan ug Daido Abcede Jr. diin molagbas ang duha ka flyovers way supak sa mga proyekto sanglit ilang gihulagway nila nga makatabang kini sa pagpaluag sa trapiko sa maong mga lugar.