NAGHIMAS sa prisohan sa Toril Police Station ang usa ka alyas Madam sa Barangay 31-D Boulevard, Davao City human nasikop atol sa buy-bust operation sa Toril Police Station alas 3 sa hapon niadtong Huwebes, Abril 15, 2021.
Usa ka hiniusang puwersa sa awtoridad ang gipahigayon nga gipangunahan sa Toril Police Station pinaagi sa hepe, Police Major Michael Uyangure, nga miresulta sa pagkasikop Techie Dejan Saberon, 45-anyos, kinsa nasikop sa atubangan sa Emar Wave Pool, Barangay 76-A, Bucana, Davao City.
Ang nahisgutan usa ka online seller nga taga Roxas Extension, Barangay 31-D, Davao City kinsa dugay nang gipanid-an sa kapulisan sa iyang ilegal nga aktibidad.
Mokantidad sa P11,400 ang gituohang shabu nga nakuha sa posisyon sa dinakpan.
Kasong pagsupak sa Republic Act 9165 kun Comprehensive Dangerous Drug Act of 2002 ang ipasaka batok sa dinakpan didto sa korte. (Jeepy P. Compio)