NIUBOS ang presyo sa karneng baboy sa Mandaue City Public Market samtang ang presyo sa manok nagpabilin.
Matod ni Edward Seno, ang supervisor sa Mandaue City Public Market nga kumpara sa presyo niadtong Enero ug Pebrero nga niabot og P300 ang kilo, karong buwana anaa nalang kini sa P270 ang kilo ug P280 ang kilo labi na sa tiyan nga parte.
Sigon niya nga nius-os ang presyo sa baboy tungod misaka na og balik ang supply sa baboy.
Niadtong liwas sa Pasko, nisaka ang presyo tungod naglisod sila sa supply ug magpadala pa ang ilang mga supplier ngadto sa kaulohan ug sa ubang parte sa Central Visayas.
Usa sa hinungdan sab niini ang pagkaylap sa African Swine Fever (ASF) sa aing lugar sa Pilipinas hinungdan nga ang suplay sa Sugbo mabahin sa
laing lugar nga naapektuhan sa maong sakit sa baboy.
Sigon ni Seno nga aduna pay mga tindera nga magpahangyo sa ilang mga suki nga kustomer diin presyohan lang nila og P250 ngadto sa P260.
Apan sa pakighinabi sa Superbalita Cebu sa usa ka manindahay og baboy sa Mandaue City Public Market, miingon siya nga wala ra nagminus ang ilang presyo ug wala sab misaka tungod P280 gyud ang ilang presyo sukad pa niadtong Enero.
Matod niya nga pahangyo hangyoon lang nila ang mga kustomer labi na kung mingaw aron lang gyud sila mahalinan.
Ibaligya na lang nila og P260 ngadto sa P270 ang kilo apan sa tiyan nga parte P280 lang ang ilang baligya.
Gani niadtong wala pa ang pandemya makahurot sila og upat ngadto sa lima ka ihaw sa baboy apan karong pandemya duha ngadto sa tulo nalang ilang maihaw matag adlaw ug maglisod pa sila sa paghurot niini. (KFD)