NASAKRIPISYO ang edukasyon ning paghugpa sa pandemya. Wala pa itugot ang face-to-face classes. Gipatuman ang distance/blended learning. Nalantawan ang pagminos sa kalidad sa edukasyon. Bisan paman sa nasinati nga suliran, dunay talagsaong inisyatiba pagtudlo panahon ning pandemiya.
Gumikan sa exemplary leadership sa edukasyon si Dr. Nancy Puentespina Berame gipasidunggan sa Outstanding Leadership Award sa World Education Leaders nga nagbasi sa New Delhi, India. Giindurso sa iyang ika-batch ’92 sa Cebu State College (CSC) pinaagi sa ilang Kalihim Bernadeth Cal.
Dakog natampo sa maong award ang pagka presidente sa CSC Batch ’92, kasinatian isip kanhi presidente sa Mactan Toastmasters Club, nangulo sa
Rotary Club of Mactan, kanhi presidente sa Lapu-lapu City Association of Private Schools ug ang iyang adbokasiya sa Living Values Education.
Gipasidunggan sab ang iyang iskuylahan Nancy Berame Childcare Center Inc.
isip Outstanding School for Providing Blended Learning sa Marso 7, 2021.
Ang krisis sa panglawas wala pasagdi sa gobyerno. Bakuna giuna bisan paman sa mga nagduhaduha gumikan niadtong kontrobersyal nga Dengvaxia sa Sanofi-France. Sinovac-China ug AstraZeneca-Britania mao pay gihatod dinhi sa nasod.
Uban donasyon, dunay kinompra. Ang Sinovac adunay 50.4% efficacy idapat sa 18-59 anyos.
Ang AstraZeneca adunay 90% efficacy nga idapat sa 60 anyos pataas. Mga tambal gilalisan pa.
Sa pandemya ang ekonomiya nalukapa. Daghang nawadan og trabaho. Nagping-it sa kalisod. Naghari ang panginahanglan. Si Gov. Gwen Garcia mibalansi sa panglawas ug ekonomiya. Gibuksan pagbalik ang turismo, gipalambo ang
agrikultura, gipatuman ang Sugbusog ug Sugbo Negosyo program, micro-business ug Enhanced Countryside Development sa tanang buot monegosyo sa food production.
Gipadayon ang paghatod sa mga proyektong inprastraktura lukop lalawigan sa Sugbo. Gihulagway nga maayo ang pagdumala ni Garcia pagsagang sa
Covid-19 gikan pa sa preventive measures pagprotihir sa 11B pesos hog industry batok African Swine Fever. (csa_1156@yahoo.com/09064648954)