SA IYANG post sa Facebook, usa ka mubo nga video presenta tion ang gipaambit ni -- Roy Genares labot sa iyang mga kasinatian sa Covid-19 sa
miaging tuig. Giulohan kini og “remembering the past.” Sa presentation makita ang mga video ug hulagway sa mga pasyente sa sulod sa labing
una nga isolation center sa dakbayan ug lalawigan sa Sugbo sa pagsugod sa tinakdanay sa virus niadtong Abril 2020.
Si Genares usa sa dul-an sa 200 ka tawo ang gipahiluna sulod sa isolation center nga mao ang ilang Bo. Luz Elementary School. Kinsa man diay ni si Genares? Nganong tunog kaayo ang iyang pangalan atol sa lockdown sa sitio Zapatera?
Si Genares lumad nga taga Sitio Zapatera. Nagsugod sa pagtungha sa ilang dapit hangtod nga nahimong usa ka magtutudlo. Karon siya ang principal sa Sirao Integrated School.
Kong inyong mahinumduman sa hinapos nga bahin sa bulan sa Marso sa niaging tuig ang kahadlok ug kahingawa sa katawhan labot sa makamatay
nga virus dili malitok og mga pulong. Hangtod nibuto ang balita nga usa ka mouopyo sa Sitio Zapatera sa Barangay Luz nagpositibo sa Covid-19 human nga nihatod og minatay sa sayo nga bahin sa bulan sa Abril 2020.
Ang 69 anyos nga drayber og dyip pasaheroan giila nga labing unang taga Sugbo nga nataptan sa coronavirus. Sa Vicente Sotto Memorial Medical Center siya nagpaalim sa iyang Covid-19 tungod kay dili na siya makapanimaho apil na ang hilanat nga mga simtoma sa makamatay nga sakit.
Human niadto nagsugod ang tinakdanay sa sitio Zapateta mao nga gipatuman ang labing unang lockdown sa kasaysayan sa Covid-19 sa dakbayan ug lalawigan sa Sugbo.
Ug ang Bo. Luz Elementary gihimo nga labing una nga isolation center sa dakbayan ug lalawigan sa Sugbo.
Gawas sa drayber sa dyip nga nagpositibo sila si Genares, ang iyang pamilya ug mga silingan maisip nga labing una nga mga natakdan sa Covid1-9 dinhi sa ato. Sa sulod sa isolation center, nagkadaiyang problema ang nitumaw. Usa ka pasyente ang way kahadlok nga nipabuhagay sa mga
kakulian sa sulod. Sila mao si Genares. Mao nay rason nga siya tinamod kaayo sa iyang mga kaubang pasyente kay gawas nga siya nagpakabana
sa ilang kahimtang, nagmugna pa gyud siya og mga kalihukan nga haum kaayo sa panginahanglan sa mga nataptan sa Covid-19. Pananglit ang zumba nga iyang gipasiugdahan. Dili lang sa ilang isolation center kini nisikat, lakip na ang ubang isolation center nga gitukod dinhi sa ato ug ubang dapit sa basod. Ang debriefing nga iyang gihimo ngadto sa mga batan-on nga nagpositibo sa virus.
Pinaagi niini iyang napakalma ang ilang nagkaguliyang nga hunahuna ug labaw sa tanan ang dautang epekto sa pandemya sa ilang mental health. Aron nga di maburyong nagpahigayon siya og film showing ug ubang kalihukan aron malikay sila sa pagsige og hisgut sa Covid1-9. Dili sayon
ang mga kalihukan nga gipasiugdahan ni Genares nga nakapalipay og mayo dili lang sa iyang mga kaubang pasyente, apul na ang iyang pamilya sa Department of Education.