SUPERBALITA CEBU

Cebu City mag speed limit na

Hulagway gikan sa Pixabay

ARON maminosan ang disgrasya ug wa nay kinabuhi nga makalas, ang Konseho sa Dakbayan sa Sugbo nipalabang sa ikatulo ug katapusang pagbasa sa ordinansa sa Abril, 15, 2021 nga magpatuman og mga speed limit sa mga sakyanan sa dakbayan.

Giuyonan sa City Council ang City Ordinance 2612 ni Majority Floor Leader Raymond Alvin Garcia nga magsilot sa mag-overspeeding.

Mapatuman kini kon mapirmahan na ni Mayor Edgardo Labella ug mamantala sa mga newspaper.

Si Garcia, sa iyang Facebook post, niingon nga nunot sa pagpatuman, ang Siyudad mamalit og mga speed gun ug speed camera nga gamiton aron pagsuta kon ang sakyanan nag overspeeding.

“Kahibalo ko nga daghan dayon ang moingon nga depende ra na’g masakpan. Actually, sayon ang dakop karon kay duna man tay paga paliton nga mga speed guns ug mga speed cameras which will be integrated sa atong bag-o lang gi upgrade nga traffic system. It will be watched closely sa atong mga kauban sa Cebu City Transportation Office,” matod ni Garcia.

Matod ni Garcia nga iyang nahuna-hunaan ang speed limit tungod sa kadaghan sa mga aksidente sa kadalanan sa siyudad.

“I don’t want to take the pleasure away from motorists who enjoy satisfying their need for speed. But, between January hangtod September 2019, ang Cebu City Transportation Office mi-respond sa 6,049 ka mga individual nga kaso sa bangga sa kadalanan. Ani nga numero, 15 ang patay ug 1,591 ang angol,” pagpasabot ni Garcia.

Gitakdang speed

Base sa nalatid sa ordinansahon, ang mga motorsiklo ug sakyanan nga adunay upat ka mga ligid, makapadagan ang mga driver hangtod 80 kilometro matag takna sa national primary roads; 70 kph sa mga national secondary roads; 60 kph sa tertiary roads; 40 kph sa provincial road; ug 20 kph sa barangay road ug crowded streets.

Para sa mga trucks, bus, tricyles ug samang mga sakyanan, 50 kph sa tanang national road (primary-tertiary), 30kph sa provincial road ug 20 kph sa barangay roads.

Sa higayon nga moepekto na ang ordinansa, ang makalapas makabayad og P2,00 sa unang violation uban sa upat ka oras nga seminar sa road safety.

Sa second offense, P2,500 ang multa ug adunay upat ka oras nga road seminar ug tulo oras nga community service samtang P3,000 sa ikatulong higayon uban sa pagka-impound sa sakyanan ug pagka-priso sulod sa 30 ka adlaw depende sa hukom sa korte.

Nalipay

Ang CO 2612 gihangop ni Regional Director Victor Caindec sa Land Transportation Office (LTO) 7, kinsa nihulagway nga ang Cebu City maoy unang local government unit dinhi sa Visayas nga nakahimo sa maong ordinansa.

“Akong dakong pasalamat ngadto kang Konsehal Garcia sa iyang pagbandera sa maong ordinansa ug sa tibuok konseho sa Cebu City sa ilang pagbuhat sa logical ordinance. And I think Cebu City is the first to create such ordinance,” padayag ni Caindec.

Matod pa sa pangulo sa LTO 7 nga suportado ang CO 2612 sa Department of Transportation, Department of the Interior and Local Goverment ug Department of Public Works and Highways ubos sa ilang joint memorandum circular 2018-001.

Sa iyang bahin, si Lyntoni Alburo, officer in-charge sa Cebu City Transportation Office (CCTO), nagkanayon nga andam silang mopatuman sa maong balaod.

“Kanunay ra gyud ming mosuporta ug mopatuman sa maong ordinansa uban sa mga equipment sama sa mga speed gun aron mahibaw-an ang mga ga-overspeeding," matod ni Alburo.

Matod ni Alburo, mahimong ma-apply ang speed gun ngadto sa mga lugar nga di daghan ang bul-og sa sakyanan sama sa South Road Properties, Transcentral Highway ug Serging Osmeña Avenue sanglit makabuylo pagpadagan ang mga motorista.

Exemptions

Apan adunay exemptions nga nalatid sa ordinansahon ni Garcia sama sa sakyanan nga nagkarga og doctor o health worker nga nagresponde og emergency call.

Wa sab malakip ang abulansiya o vehicle nga nagresponde og emergency gikan o paingon sa lugar nga nahitaboan, mga sakyanan nga nagdala og masakiton alang sa emerhensiya nga panginahanglan sa ospital o clinic.

Sakyanan sa Armed Forces of the Philippines nga gigamit sa official purpose sama sa pagtubag sa riot, insurrection o invasion ug ang sakyanan nga gigamit sa paggukod sa mga kriminal.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!