NASUNOG ang usa ka storage sa mga bike parts ug bike accessories sa S.B. Cabahug St., Barangay Ibabao, Mandaue City alas 10:20 sa buntag sa Sabado, Abril 17, 2021.
Matod ni Chief Insp. Nelson Ababon, hepe sa Mandaue City Fire Station (MCFS), nga nadawat nila ang alarma alas 10:20 sa buntag sa pagkasunog sa storage sa bike parts sa ikaduhang andana sa Hangout building.
Matod ni FO1 Denzel Espares, sa Mandaue City Fire Station, nga nakadawat sila sa alarma gikan sa usa ka concerned citizen nga nagpuyo duol.
Sigon niini nga nakakita siya og aso gikan sa building hinungdan nga daling nialarma sa kabumberohan.
Matod ni Espares nga ang storage iya sa establisemento nga namaligya og mga bike parts ug bike accessories.
Naabot sa Hangout building ang kabumberohan alas 10:23 sa buntag.
Human maabot sa nasunog nga bodega, giisa dayon kini sa first alarm.
Human ang 15 minutos, nakontrolar na sa kabumberohan ang sunog.
Laing 13 minutos ang milabay, gideklarar na nga fire out.
Nikabat ngadto sa P25,000 ang danyos sa sunog, matod ni Espares.
Matod ni Espares nga nagpadayon pa gihapon ang ilang imbestigasyon sa hinungdan sa sunog.
Gani wala pa sab silay mahatag kon unsa ang hinungdan. (KFD)