PAMPANGA

Garcia: Pamalsinta at Pamikaluguran king Panaun ning Kaligaligan (Love and Friendship in the Times of Crisis)

Kapisik

“Ing kakaluguran lulugud ya karing sablang panaun,

at ing kapatad mibabait ya king panaun ning kaligaligan.”

~Diparan?Dangka 17:Sunis 17

(Proverbs 17:17)

“Ninu man ing ating kakaluguran a e ayasaan tambing yang miraras king pangalagsak,

dapot ating kakaluguran a e maglakwan migit pa kesa keng kapatad.”

~Diparan?Dangka 18:Sunis 24

(Proverbs 18:24)

“Ing kanangga at ing pabusuk a mabanglu magdalang tula king pusu,

at ing kayapan ning kakaluguran magmula king usuk a manibat king pusu.

E me panasakitan ing kakaluguran mu o ing kakaluguran ning lipi mu,

at e ka pupunta king bale ning kamaganak mu kabud dintang keka ing kaligaligan—

lakwas yang mayap ing malapit a siping bale kesa king kamaganak a makadayu.”

~Yob?Dangka 16:Sunis 20-21

(Job 16:20-21)

“Ing lugud mapibabata ya, ing lugud maganaka ya.

E ya mangarirya, e ya magpangaya, e ya matas a lub.

E na la sisiran dangalan ding aliwa, e na pagdulapan ing sarili na,

e ya kabud mimwa, e na la tatandanan ing maling dapat.

Ing lugud e ya matula king karokan dapot magi yang matula king katutwan.

Parati yang manglwalu, parati yang manalig, parati yang mamasa, parati yang magsikap.”

~Mumunang Korintyanu?Dangka 13:Sunis 4-7

(1 Cortinthians 13:4-7)

“Alang takut king lugud. Dapot ing pantas a lugud tatabi na ing takut;

uling ing takut atin yang kabaldugan king parusa.

Ing ninu mang tatakut e ya maging pantas king lugud.

Lulugud tamu uling liguran na katamung minuna.

Ninu mang sasabing kaluguran ne ing Dyos dapot kasaman ne ing kapatad na malaram ya.

Pauli ning ninu man a re lulugud king kapatad nang akakkuit na,

e ne malyaring luguran ing Dyos, a e na pa ikit.

At pigkalub Ne ing kautusang ini:

Ninu mang kaluguran ne ing Dyos dapat kaluguran na la naman ding kapatad na.”

~Mumunang Aklat nang Wan?Dangka 4:Sunis 18-21

(1 John 4:18-21)

***

Ing kakaluguran king maslag a aldo aliwa ya king kakaluguran king panaun ning sigwa o kakaluguran. Nung ing tau mayap ya mu keka potang masalese ing kabilyan akit mu nung makananu ya kakayap keka karatang ning sigalut a maragul o lusuk a kaligaligan anti king panaun ngeni.

Mekad agyang masakit ka mu abalu mu na nung makananu ka kaulaga karing meyaus mung kakaluguran. Atin ta’ng kakaluguran karing kapatad, anak o pengari o ninu man a kamaganak, dapot atin tamu namang kakaluguran a e ta nanu balang o e ta kadaya. Atin mu namang akatalamitan tamu mu keng social media at angga ngeni akakasabi ta ya pa aldo’ldo at pena-penandit uling dakal kayu apipikasundu.

Mapalyaring ing kekang kakaluguran metung yang akaklasi, akayabe keng metung a pamitipun o mekad metung yang meging sadyang talaturu.

E king kelambatan o kasagulyan mayayakit at pipapatunayan ing kayapan ning pamikaluguran. Mengari king lugud, ing tune pamikaluguran masusukad kabud dintang ing lusuk a pamangaylangan. Ing pamangaylangan kabud na datang at kanita mu la akilala ding tune kakaluguran.

Nung dintang ing aldo melipit ka, megipit ka o mesakit ka—kanita da ka lakwan, pangilagan at kalingwan ding e tutu at e tapat a “kakaluguran”. Anti king panaun ngeni, nung mikasakit kang makayawa anti king Covid-19, akit mu la o salikutan da ka pa ring mesabing kakaluguran mu at pangilagan da ka pauli ning sakit mu. Dapot ding tune kakaluguran e da ka lakwan at nung e da ka man adalawan e da na ka man pangilagan nung e lumawe lang paralan bang apasikan da ka lub, e itang itabi da ka pa anting asung galisan.

Asasaksyan tamu ngeni ing pamikaluguran a mangasira king panaun ning kaligaligan a darala ning sakit a makayawa keti king yatu. Makanyan man, nung ing kakaluguran mu pangilagan na ka uling mikasakit ka, e na ka man sasakit lub nung pangilag na la mung miyawa ding pamilya na subali pa king sarili na. Agyang ninu naman e bisang miyawa. Ing pangilagan na ya pin ing sakit at aliwa ika.

Sana ibili tamu ing sarili tamu king kabilyan ding pakakalulung kakaluguran a mimingat mung e miyawa uling masakit ing mikakasakit anti king sakit a makayawang lalaganas ngeni mabilug a yatu. Mekad e na ka naman pandiryan, nung wari tatakut ya mung mikasakit uling mal ing gastus at mekad e na agyu uling ala yang salapi.

Mipanimbang tamu mung masalese, abe.

***

Dake Talabaldugan:

1. mipangamal (pangdiwa) mipate o migawang gamit la ring taliri at kuku. English - to fight nail to nail; to caress each other roughly. Alimbawa king pamangamit: “Mipaglampung la pa nandin deng pusa ila nring asu kabud-abud mipangamal la mu naman kaybat nita.”

2. mipamangal (pangdiwa) mipamitna, agnan mamangal. English - to simultaneously divide or cut something into halves at the same time Alimbawa king pamangamit: “Kaybat dang menalukyat keng impun ungut deng mikaluguran —mipamangal la kareng bukung inagtal da kabang paynawa la.”

3. mipamangan (pangdiwa) kanan ing metung at metung o kanan ing pamangan ning metung at metung. English - to eat each other simultaneously or feed each other’s food at the same time Alimbawa king pamangamit: “E da balu milibe la pala bakal deng mikaluguran inya mipamangan lang daralan a pamangan e da tambing abalu.”

***

SADYANG GAWI DA RENG KAPAMPANGAN

Kanita, neng ditak la mung maki-gripu kareng baranggay—dakal la pang gagamit tambayuk neng manyaklu lang danum kareng talaga o bombang gripung pambaranggay. Deng tambayuk ila retang gawa keng kwayan a pisasabitan dang timbang misusumangid deng manyaklu. Magagamit la naman deti kareng magtindang kapangan—kutsinta, putu lasung, kalame tibag, motsi at aliwa pa.

Ngeni, malagad na lang tutu reng gagamit tambayuk. Maralas guyuran na la o tricycle deng gagamitan dang panakut deng kabalen. Pamanambayuk—gawi iting mekalingwan na naman.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph