Daclan: Dharna si Christian Bables?

Dharna” syagit ni Christian Bables sa pelikulang “Big Night!”. Samtang wa pa kalupad ang TV Series nga “Darna” ni Jane de Leon, unahon nato og tan-aw kon unsay drama ining Christian?

Sa mga nakakita na sa gipagawas nga trailer niini online, siguradong malingaw ka kang Dharna.

Mao kini ang papel ni Christian sa maong pelikula, kon na-impress ka niini sa iyang kausaban sa “Your Face Sounds Familiar” matag semana, dinhi sa “Big Night!” malingaw usab ka niya.

Balik bading ang papel ni Christian dinhi ug pwerte gihapon kining angayana.

Unsa ug asa kutob ang imong buhaton para lang malimpyo ang imong ngalan?

Dharna ang tawag nila dinhi kang Christian. Sa istorya, nahi-apil ang ngalan niini sa watchlist o sa mga tokhangonon.

Karon buhaton niya ang tanan para malimpyo ang iyang ngalan. Dinhi nagsugod ang mga riot nga eksena ug sa trailer pa lang makatawa ka na.

Mopakatawa usab kanato ang iyang mga kauban dinhi sama nilang Eugene Domingo, John Arcilla, Ricky Davao, Janice de Belen, Gina Alajar ug Gina Pareño.

Kauban usab silang Awra Briguela, Allan Paule, Nico Antonio, Martin del Rosario, Soliman Cruz, ug daghan pa.

Ang “Big Night!” hatod kanato sa Cignal Entertainment, The Idea First Company, Octobertrain Films, ug Quantum Films sa direksyon ni Jun Robles Lana, Ay’g Saba!

* * *

Congratulations kang Kaye Abad ug Paul Jake Castillo kay lalaki na usab ang ikaduha nilang baby.

Mao kini atong nakita sa post ni Kaye sa gibuhat nilang gender revelation ug sama sa una lalaki gihapon kini, kongrats Kaye ug Jake, Ay’g Saba!

* * *

Angelica Panganiban gitubag ang basher niini nga gitawag siya og laos, pero ngano gud tawn nga hangtod karon anaa pa man kini career ug aktibo pa gihapon sa limelight.

Matod pa ni Angelica nga mao daw kini ang gitawag og mga black troll nga binayran.

Kon ang aktress pay pasultion, karaan na ang style niini ug ilisi kini og bag-o, Ayg Saba!

* * *

Gikataw-an lang sa gwapang si Ellen Adarna ang fake news nga ninggawas nga lagi gipangwartahan lang siya ni Derek Ramsay.

Kon mao man gani kini, dili siya boang nga mosugot lang kon tinuod man gani ug dili sab niya type ang mahimong sugar mommy.

Kagwapa ra sab niya nga hukhokan lang og lalaki, pwerting katawa sa gwapa sa maong fake news. Suya lang sila kay gwapa siya! Korek, Ay’g Saba!