MAS daghan ang naisyuhan og traffic citation ticket sa unang 15 ka mga adlaw sa Abril kon itandi sa samang mga adlaw sa Marso 2021.
Gikan sa Abril 1-15, ang Cebu City Transportation Office (CCTO) nakaisyu og 6,849 ka mga TCT.
Mas taas kini kon itandi sa 6,317 ka TCT nga naisyu niadtong Marso.
Matod sa CCTO, sagad sa mga kalapasan naglangkob sa overloading, wa pagtuman sa no stopping sign anytime, parking sa sidewalk, disregarding traffic sign (DTS) kun wa pagtuman sa traffic sign, depektuso nga mga suga sa plaka, depektusong headlights ug uban pa.
Naka impound usab sila og 10 ka electric bikes, usa ka traysikad, siyam ka four-wheeled nga mga sakyanan, usa ka traysikol, usa ka PUJ, walo ka mga dumptruck ug duha ka gagmay nga trucks.
Moabot usab og 160 ka mga sakyanan ang ilang na-clamp sud sa 15 ka mga adlaw nga operasyon pagpatakag parking sa kadalanan sa Dakbayan sa Sugbo sa adlaw ug gabii.
Ang CCTO nipahimangno sa mga driver nga naisyuhan og TCT sa pagbayad gilayon sa mga multa aron di kini modakug maayo kon moabot sa korte.
Niadto lang Marso, mokabat sa 104 ka kaso ang na file sa ilang legal section batok sa mga driver nga wa mo-settle sa ilang obligasyon.
Niawhag usab sila sa mga driver sa pagtuman sa mga balaud sa trapiko aron makalikay sa dakop.
Ang CCTO kanunay nang nagpahigayon og operasyon uban sa Highway Patrol Group (HPG) ug Land Transportation Office (LTO). (REV)