GIHATAGAN og advice ni Johnriel Casimero ang iyang umaabot nga kontra nga si Guillermo Rigondeaux human nahimong opisyal ang ilang away kagahapon.
“Its Onnnnn. Magsimula ka na mag jogging para ready ka tumakbo sa August,” matod pa ni Casimero nga gi-post sa iyang Twitter nga patutsada ngadto sa iyang kontra nga usa ka gold medalist gikan sa Cuba.
Sila gikatakdang magbinayloay sa ilang kumo karong Agusto 15 nga maoy gianunsyo sa Showtime nga apil sa ilang busy nga schedule gikan sa buwan sa Mayo hangtod Septiyembre.
Apil sa Showtime program ang dugay nang gikaintapan nga away tali ni Nonito Donaire Jr. ug Nordine Oubaali para sa bantamweight version sa WBC karong May 30.
Ang away ni Casimero batok sa 40 anyos nga si Rigondeaux maoy gipaabot sa kadaghanan human gihagit sa WBO champ ang Cuban nga moaway kaniya sulod sa booth sa telepono sanglit magsige lang kini og boxing ug sayaw sulod sa ring nga maoy iyang naandan.
“Walang takbuhan. Basagan lang tayo ng mukha,” padayag ni Casimero kinsa adunay record nga 30-4 uban sa 21 ka knockouts. Presko pa sa iyang kadaugan si Casimero human iyang gipaundang si Duke Micah. (PAC)