TUNGOD kay adunay pandemiya, simple nga gisaulog ni Christyll Tecson ang iyang 18th birthday niadtong Marso 8, 2021.
Apan bisan kon yano ang kasaulogan, memorable usab kini. Gisurprisa si Christyll sa iyang suod nga mga higala.
Giangkon sa dalaga nga gibati siya og gamay nga kaguol nga di bongga ang kasaulogan sa iyang debut, apan mapasalamaton gihapon siya tungod kay intact ang iyahang pamilya ug gisurprisa usab siya sa iyang mga higala sa high school sa University of Cebu main campus.
“Special sad diay ko sa uban. Importante sad diay ko nila. Nakahunahuna sila nga i-surprise ko. Maka-overwhelm ba,” paambit ni Christyll.
Usa ka salo-salo ang gihimo sa ilang panimay sa siyudad sa Sugbo.
Matod ni Lito Tecson, amahan ni Christyll, nga gipasabot nila daan ang iyang anak nga tungod sa pandemiya, dili bongga ang pagpahigayon sa debut niini. Ug kini nasabtan sa ilang kamanghuran nga anak sa tulo ka magsuon.
“Happy ra siya kay naa mi tanan iyang pamilya. Kahibawo man gyud siya nga naay pandemiya, ni-okay siya,” sigon ni Lito.
Bisan kon way bongga nga debut party, gituman sa amahan ang pangandoy sa dalagang anak, ang paghimo og debut pictorial ug video.
Gikalipay kaayo kini sa anak. Ang shoot gipahigayon sa lungsod sa Borbon, ang yutang natawhan ni Lito, usa ka semana sa dili pa ang birthday sa dalaga.
Sa iyahang debut, pangandoy ni Christyll nga moabot ang panahon nga makapakaon siya sa mga bata nga libud-suroy sa kadalanan.
Karon nga naa na siya sa legal age, matod ni Christyll, nga mag-mature usab siya sa iyang panghunahuna.
Sumala niini kon unsa man ang iyahang nabuhat, iyang dawaton ug dili ibasol sa uban. (SCG)