Binasi sa Buhat 3:13-15, 17-19; Salmo 4; 1 Juan 2:1-5; Lucas 24:35-48
ANG bukas nga hunahuna”, kuno, “susama sa bukas nga baba. Ang gamit niini mao ang pagsira niini sa butang nga tibuok,” matod pa sa Katolikong manunulat nga si G.K. Chesterton. Ang bukas nga huna-huna diay nanginahanglan og mga bus-ok nga panghunahuna aron mabusog, sama nga ang bukas nga baba mangitag makaon nga makapabusog ug makapabaskog. Kon kanunay lamang nga “junk food” ang kan-on sa usa ka tawo, mabusog tingali siya apan dili baskog. Sa ingon, kon ang kanunayng mosulod sa salabotan sa tawo mao ang waykapuslanan nga mga panghunahuna, malingaw tingali siya apan taphaw iyang panglantaw sa kinabuhi.
Daghang magdaog diha sa hunahuna. Diha gikan ang kangitngit, diha pod ang kahayag. Sa Ebanghelyo, mipatigbabaw ang kangitngit nga dala sa kahadlok sa mga disipulo ni Jesus. Nalisang sila sa pagkakita nila kang Jesus nga naaan nila siyag kalag. Sa ingon, abi pod nila nga hapit na ang paghukom sa Dios. “Nangalisang” ug “nangahadlok” sila. Ang pagkalisang makapuwas kanato sa maayong panghunahuna. Mawad-an tag maayong pangisip. Ang kahadlok, sa laing bahin, makagapos kanato ug dili na kita masayod sa angay buhaton.
May tulo ka lakang nga gihimo si Jesus aron paglupig sa gibati sa mga disipulo. Una, gihatag niya, pinaagi sa pulong, ang iyang kalinaw ngadto kanila. Human niini, sa nakamatikod si Jesus nga aduna pa silay mga madudahong pangutana mahitungod kaniya, gipakita niya ang iyang mga kamot ug tiil. Gipakita niya kini ngadto sa mga disipulo aron ilang gunitan. Tungod kay “dili pa sila makatuo gumikan sa kalipay ug nahibulong pa sila”, nangita siyag makaon. Mikaon siya og usa ka sinugbang isda sa ilang atubangan.
Sa matag lakang nga gibuhat ni Jesus, nagkaanam siya og kaduol sa punto diin “giablihan niya ang ilang hunahuna aron pagsabot sa mga Kasulatan.” Gihawanan usa ni Jesus ang mga hunahuna sa mga disipulo - mga hunahuna nga maoy gigikanan sa kahadlok o bunga ba hinuon niini – ug unya gipasabot niya ang balaang kasulatan ngadto kanila. Kining pagpasabot midugtong sa mga saad ug panghitabo sa Karaang Kasabotan nga mipunting kang Jesus.
Ang pag-abri sa hunahuna mao ang pagbukas niini sa hingpit pinaagi sa pagkompleto sa proseso nga gikinahanglan sa pagbukas. Lakip na niini ang paghawan sa hunahuna sa mga gikahadlokan niini. Ang kataposang lakang, nga mao ang pagkaon atubangan sa mga disipulo, nagpakita nga dili kalag si Jesus ug nga nagpadayon gihapon ang naandang higayon kanus-a makighugoyhugoy si Jesus kanila. Panahon usab kini sa iyang pagpanudlo.
Gawas sa kahadlok ang pagkaignorante usa usab ka kahimtang sa hunahuna. Diha sa Buhat gipahinumdoman ni Pedro ang mga Israelita kon giunsa nila pagsalikway kang Jesus nga ilang gipapatay. Gihimo nila kini tungod sa ilang “pagkaignorante”. Kining ilang gibuhat tungod sa ilang pagkaignorante gigamit sa Ginuo aron matuman ang iyang plano sa pagpanghinlo sa sala. Gipahinumdoman usab sa sulat kang Juan nga bisag makasala ta, human masinati ang gugma sa Dios, nga dili madismaya kay “kita may manlalaban nga si Jesucristo, ang matarong nga maoy mangatubang sa Amahan.”