DAGKO ug gagmay, naninguha karon nga makabentaha. Mao nga abi nako nga pamaagi batok sa Covid-19 kining dili na patunulon og pagkaon ngadto sa mga priso sa Bagong Buhay Rehabilitation Center (BBRC).
Apan ang mga sakop sa Bureau of Jail Management and Penology (BJMP), nga negusyante man diay ang mga hinampak. Ila diayng gibuhat aron mapugos ang tanang priso nga sa ilang tindahan mopalit.
Di man kaayo tantong mahal. Ang baboy tag P320 ang kilo. Ang manok moabot og P270 ang kilo.
Ang gusto og sinako sa bugas humay tag P2,850. Ang di maka-afford kay tag P30 lang ang usa ka takos sa lata sa sardinas. Ang gustog usa ka sakong bugas mais kay P1,750.
Taas na kaayo ang listahan kon iapil nako karon. Pero kon way aksyon nga atong madunggan, atong dugangan ang atong listahan. Matuk-an unta ang mga sakop sa BJMP nga nakabahin ini. Ug di ko motuo nga wala mismo moabot sa level sa warden. Aw, sori lang sir Warden.
Basta hunahunaa lang nga kining BBRC maoy giingong nga labing huot nga prisohan sa tibuok nasud. Ambot kon pila na ang mga pasyente sa Covid-19 sud sa BBRC. Ang ako lang nabasahan nga moabot na og kapin sa 5,000 ang mga priso.
Makaginansya ra man unta og dako bisan pag mag-Ininsek og style sa pag-negusyo. Kanang ginagmay lang ang ginansya.
Apan, kay nanubra man kahakog ang mga BJMP sa BBRC, di kontento ang mga hanggaw. Wa maluoy nga kining ilang gibiktima kasagaran mga kabus.
Bisan mobasi na lang unta sa ngalan nga Bagong Buhay Rehabilitation Center (BBRC), sukwahi na kaayo kining maong kalaki sa tindahan sa BJMP sa binuhatan.
Naa koy daghan taho nga nahipos apan wala pa masulat. Bisan pa man, hinaot duna pay modugang text kanako kabahin sa mga anomaliya ug overpricing.
Ang akong plano karon nga kining akong gisulat madugangan pa kay nganon man diay og kada lindog nato, kini lay atong hisgutan kada lindog. Baga-a sa kaspa niining mga abusado kon di matandog.
Maninguha sab ko nga kining akong lindog moabot unta sa ubang mga sakop sa media aron mahisgutan usab nila. Hinaot nga maka-interes sab ang mga taga telebisyon. Ug maka-interes moimbestiga ang Cebu City Hall ug ang Department of Trade and Industry (DTI).
Alang kanako, dako man unta og grasya alang sa motabang sa mga priso, apan kining mga taga BJMP nga gitahasan sa pagtabang kanila mao man hinuon nga mga abusado.
“I was naked and you clothed me, I was sick and you visited me, I was in prison and you came to me.” Matthew 25:36. (DM @anol_cebu)