MORAG mahulog ni sa kanta nga: ‘Ang tiguwang bisan bako, maningkamot motindog, mobarog aron molabyog’.
Gibutyag ni Presidente Rodrigo Duterte nga dili na lang siya magpabakuna kontra Covid-19 gumikan sa iyang pangidaron nga 74 anyos. Tiguwang na kuno siya. Matod pa niya nga andam niyang ihatag ang iyang share sa bakuna ngadto sa mga batan-on nga dako pa kaayo og kaugmaon sa ilang kinabuhi. Morag miingon ang Presidente nga para sa unsa pa man nga tiguwang na siya ug wala nay kapuslanan.
Kon atong palawuman og maayo ang maong tudling sa iyang pamahayag, mora man og nawad-an na siya og paglaum. Mora man og mi-ingon siya nga ang mga tiguwang wala nay pulos ug dili na productive sa nahibiling katuigan sa ilang kinabuhi ning kalibutan. Magpa-abot na lang sa ilang sentensiya kon kanus-a sila kuhaon sa Labaw’ng Makagagahum. Alang sa mga tiguwang, may punto ba ang Presidente?
Ning panahon sa retirement sa mga senior citizens importante kaayo nga aduna silay kalingawan.Kon si Presidente Duterte pay pasultihon: ‘Mas palabihon na nato karon ang mga batan-on kay sila mga produktibo pa kaayo ug lahi kaayo sa unsa ra ang maabot sa mga tiguwang. Aduna tingali mga tiguwang nga mosupak sa pamahayag sa Presidente. Apan dili nato mahimong lalison ang kamatuoran nga sa kinabuhi dili mahinungdanon ang edad, kon dili giunsa nato sa paggamit ug pagpahimulos sa atong kinabuhi. Ug ang mga senior citizen miani na sa daghang bililhong kasinatian nga dili malabwan sa bisan unsang bahandi.
Ug angay na nga motunol ngadto sa mga bag-ong tubo sa unsa man ang ilang nasugdan sa kinabuhi. Kay mao man sab kana ang gimbut-an sa balaod sa kinaiyahan.
Sama sa mga dagkong kahoy moabot gyod ang panahon sa iyang pagkalaya. Apan samtang siya malaya, moturok usab ang bag-o ug lab-as nga mga binhi nga mao na usab unya ang mopabarog og dagkong mga punuan ug mopalipang sa bag-ong mga sanga ug berde nga kadahunan nga magtimaan sa pagpadayon sa kinabuhi. (bobbygnalzaro@gmail.com)