Di momenus 305 ka mga pasahero nga molarga unta padung gawas sa Cebu gipapauli sa mga awtoridad human nag isyu ang Philippine Coast Guard og notice nga temporaryong nagsuspenso sa mga biyahe sa dagat nga padung sa mga lugar nga gipaubos sa tropical cyclone warning signal (TCWS) no. 1 tungod sa Bagyong Bising, Sabado sa buntag, Abril 17, 2021.
Si Mary Knoll Lague, Cebu Port Authority public relations officer, nagkanayon nga lakip sa mga nakanselar nga biyahe mao ang 8:30 a.m. nga byahe gikan sa Danao Port, northern Cebu ngadto sa Camotes Island, nga gipaubos sa TCWS 1.
Tungod niini, anaa sa 286 ka mga pasahero ang gipapauli usab human sila makadawat og refund sa ilang mga ticket.
Wa hinuoy mga na stranded nga pasahero sa Pier 3 sa Cebu City bisan kon dunay pito ka mga pasahero nga mobyahe paingon sa Cagayan de Oro ang naghuwat nga makasakay sa barko, matod ni Lague.
Dugang niini, gikanselar usab ang biyahe gikan sa Hagnaya Port paingon sa Masbate ug upat ka pasahero ang gipapauli.
Lain usab 12 ka mga pasahero nga bound for Camotes ug Ormoc nga naghuwat sa Pier 1 Cebu City ang wala kadayon sa pagbyahe.
Mao kini ang uban pang mga byahe nga gikanselar tungod sa bagyo: Cebu to Hilongos, Leyte; Cebu to Dipolog; Cebu to Baybay, Leyte; Cebu to Surigao; Cebu to Palompon, Leyte, ug Cebu to Bato, Leyte.
Mipasaka og temporary suspension notice ang Coast Guard Station (CGS) Central Cebu, niadtong Sabado, Abril 17, alang sa sea trips nga paingon sa mga lugar nga ubos sa Signal no. 1 sama sa Northern Samar, Eastern Samar, Samar, Biliran, Southern Leyte, Camotes Island, ug Leyte dinhi sa Visayas tungod sa Typhoon Bising.
Nagkanayon si Jhomer Eclarino, weather specialist sa Philippine Atmospheric Geophysical and Astronomical Services Administration- Mactan station, nga magpabilin nga kritikal ang kondisyon sa panahon sa Camotes Island ug northern Cebu hangtod Lunes sa hapon, Abril 19.
Samtang ang ubang lugar sa Cebu makasinati og light to moderate with ocassional heavy rains hangtod Lunes.
Base sa alas 4 sa hapon nga taho sa Pagasa kagahapon, ang mata sa bagyo nasigpatan 480 kilometros east sa Guiuan, Eastern Samar ug adunay maximum sustained winds nga 195 kilometer per hour (km/h) ug gustiness nga moabot sa 240 km/h.
Giisa usab sa Pagasa ang TCWS 2 sa Northern Samar, Eastern Samar, ug Samar alang sa Visayas ug Catanduanes sa Luzon. Samtang ang Biliran, Leyte, Southern Leyte, and Camotes Island, ug ang ubang mga lugar sa Luzon ug Mindanao gipaubos sa TCWS 1. (WBS)