GIHATAGAN sa Traffic Enforcement Agency of Mandaue (Team) ang mga drayber ug operator sa traditional public utility jeepney (TPUJ) hangtod Abril 19, 2021 sa pagkuha sa mga rekisitos nga gikinahanglan sa di pa sila mobalik og biyahe.
Kini human, nadakpan sa Team ang 50 ka mga drayber sa TPUJ nga nidagan sulod sa dakbayan sa Mandaue nga way igong dokumento nga ikapakita atol sa ilang random checkpoint niadtong miaging semana.
Matod ni Edwin Jumao-as, executive director sa Team, nga bisan nasakpan nila nga way kompleto nga dokumento nga sila mamahimo nang makabiyahe, wa una nila giisyuhan og citation ticket.
Sigon niya nga igo lang nila gibadlong ug gipabalik kon asa sila nga rota gikan.
Gani, mipatuo ra ang mga TPUJ drayber ug sa tan-aw ni Jumao-as nga kahibawo na sila nga manginahanglan pa og Team clearance ang dakbayan sa Mandaue tungod kay wa sila mikwestyon sa ilang abiso.
Ang mga dokumento nga kinahanglan ipresentar sa mga inspection officer mao ang: special permit to operate gikan sa Land Transportation Franchising and Regulatory Board (LTFRB), special permit to operate gikan sa Land Transportation Office (LTO), Team Clearance, ug negatibo nga resulta sa RT-PCR swab test.
Matod ni Jumao-as nga gipahigayon nila ang random checkpoint kuyog ang Highway Patrol Group (HPG) gikan sa Police Regional Office (PRO 7) human ilang nakita nga daghan nang nidagan nga mga TPUJ, apan 69 pa lang ang ilang natala nga nakakuha og Team clearance.
Sa pagpahigayon nila sa random checkpoint, nasakpan nila ang 20 ka TPUJ gikan sa Lapu-Lapu ug 30 ka mga TPUJ gikan sa Liloan nga misulod sa dakbayan nga wa nakakuha sa mga dokumento nga kinahanglan una makabiyahe og balik.
Aron mapahingusgan, nipagawas si Jumao-as og usa ka memorandum niadtong Abril 16 ngadto sa tanang mga drayber ug operator nga kinahanglan nila nga sundon ang mga kinahanglanon nga dokumento sa di pa mag-operate.
Gihatagan lang ni Jumao-as ang mga TPUJ driver ug operator nga moproseso sa ilang mga dokumento ining Abril 19.
Human sa Abril 19, matod ni Jumao-as nga hugtanon na nilang ipatuman ang pag-inspeksyon sa pagtuman ug pagkuha sa kinahanglanong mga rekisitos sa TPUJs.
Giingon niya nga ang mapakyas sa pagpresentar sa mga kinahanglanon nga dokumento sa mga nag-inspeksyon nga enforcer hatagan dayon og citation ticket.
Apan, giklaro sab ni Jumao-as nga mamahimo pa gihapon nga makaproseso sa ilang dokumento human sa Abril 19.