GIBUTYAG ni Dr. Agnes Realiza, pangulo sa City Health Office sa dakbayan sa Lapu-Lapu, nga magsugod na og pamakuna ang kagamhanan sa dakbayan sa mga senior citizen karong Lunes, Abril 19, 2021.
Kini bisan kon aduna pay nahabiling medical frontliners sa dakbayan nga wa pa mabakunahi.
Matod ni Realiza nga nananghid na sila sa Department of Health DOH-7 nga mamakuna na sila sa mga senior citizen, inay maghuwat sa mga wa pa mabakunahi nga medical frontliners, aron makasugod na.
Kon ugaling aduna pay medical frontliners nga moapas pabakuna, ila gihapon kini nga turokan ug idungan pagbakuna sa mga senior citizen.
Gipasabot ni Realiza nga nahuman na unta ang schedule nga gitagana alang sa medical frontliners, apan adunay wa gihapon magpabakuna busa nakadesisyon na sila nga di na lang sila huwaton.
Nasayran nga sa target nga 3,000 ka mga frontliner nga bakunahan, moabot sa 2,600 ang nabakunahan na kun 70 porsyento.
“Personal gyud na nila nga desisyon. Kaning uban di gyud sila magpabakuna. Naa gihapoy mahadlok bisag unsaon nato og awhag nga mas maayo magpabakuna,” pasabot ni Realiza.
Giawhag lang ni Reliza ang mga senior citizen sa pagparehistro online sa dili pa moadto sa vaccination site sa kabarangayan aron dali sila nga maatiman.
Ila nang gitagaan ang mga opisyal sa barangay sa link alang sa online registration ug sila na usab ang mopahinumdom sa mga senior citizen asa sila nga vaccination site moadto.
Kon ugaling modiritso sila sa vaccination site nga di magparehistro daan, posibleng malangay pa sila sa higayon nga wala ang ilang ngalan sa masterlist.
Nanghinaot si Realiza nga daghan unya ang magpabakuna sa mga senior citizen sa dakbayan.
Sa listahan sa Office of Senior Citizen Affairs (OSCA) sa dakbayan, adunay 20,000 ka mga senior citizen apan sa lista sa DOH-7, moabot kini og mga 40,000 sumala ni Realiza
Target sa kagamhanan nga mahuman pagbakuna ang mga senior citizen sulod sa usa ka buwan. (GCM)