WAY pagsupak ang hepe sa Police Regional Office 7 (PRO) 7 sa plano ni Cebu Governor Gwendolyn Garcia sa pagwagtang sa multa niadtong masakpan nga nakalapas sa minimum health standard sama sa wa pagsul-ob sa facemask ug face shield.
Nimando usab si Garcia sa bag-ong milingkod nga hepe sa kapulisan sa probinsya sa Sugbo, Police Colonel Engelbert Soriano, nga di na estriktuhon ang pag sul-ob sa facemask sa kalungsuran.
Matod sa gobernador, sa dihang nahinabi sa mga tigbalita, nga mahimo lang nga warningan ug di na pasakaan og kaso lakip na pamultahon ang masakpan nga walay tabon sa ilang ilong ug baba.
“They can be reminded to wear a mask, admonished to wear a mask, but never should they be mistreated,” matod ni Garcia.
Matod ni Police Brigadier General Ronnie Montejo, hepe sa PRO 7, nga nipagawas usab siyag kamandoan sa mga hepe sa kalungsuran nga kon makasugat silag mga tawo nga wa mag facemask badlungon lang kini ug hatagan og facemask.
Matod niya nga sa iyang opisina lakip na sa mga supply offices sa kapulisan sa probinsya sa Sugbo, adunay daghang facemask nga mahimong maoy ipang apud-apud niadtong mga tawo nga walay ikapalit.
“Atong tagaan og additional nga mga facemask or kon naay face shield, mas maayo,” matod ni Montejo.
Lakip sa iyang mando sa iyang mga sakop sa probinsya nga kon adunay makit-an nga tawo nga nag sul-ob man sa facemask apan wala matarong, hinayon lang kini sa pagpasabot nga kinahanglan nga saktohon sa pag gamit.
Dugang ni Montejo nga dili pa gihapon angay nga mokompyansa karong mga panahona nga kinahanglan pa nga ipatuman ang lagda sa Inter-Agency Task Force (IATF) labot sa minimum health standard.
Kon ugaling makaduha ngadto sa maka lima ka higayon nga dili motuo ang maong tawo, diha na molihok ang pulis pinaagi sa pag silot niini.
Si Soriano, sa iyang bahin, nagkanayon nga andam nila nga tumanon ang mando sa gobernador kaniya.
Usa sa mando mao ang dili pagsunod sa gihimo sa mga pulis sa Cavite diin adunay namatay nga residente human nga gipa push up tungod kay nadakpan nga wa mag facemask.
Matod ni Soriano nga nakasabot siya sa gobernador sanglit nakita niini ang nasinating kalisud karon sa mga Sugboanon tungod sa miigo nga pandemic.
“Sabi niya sa akin, ang stern warning niya, wag na wag mangyari yan sa Cebu province. So yun ang kabilinbilinan niya. Many other instructions pero reading between the lines, we have uplift na poor specially during this pandemic,” matod ni Soriano.
Apan miawhag pa gihapon si Soriano sa publiko nga ipadayon ang pagtuman sa health standard sanglit wala pa mawagtang ang Sars-CoV-2, kagaw nga nagdala sa coronavirus disease 2019 (Covid-19).