GIDAGIT sa upat ka mga tawo nga nagpatuong mga agent sa Philppine Drug Enforcement Agency (PDEA) 7 sa Sabado sa alas 6 sa buntag, Abril 17, 2021 sa Fatima, Basak Pardo, Dakbayan sa Sugbo.
Sa pagsuwat ning taho, wa pa makit-i sa iyang pamilya si Riel John Cartuciano, 18, tinun-an sa high school.
Si Rhandel Cartuciano, 22, maguwang, accountant sa usa ka kompaniya sa motorsiklo, niingon sa interbyu sa Superbalita Cebu nga ang ilang balay gisulod sa upat ka mga lalake nga nagpailang mga PDEA agent.
Apan sa ilang pagsusi sa buhatan sa PDEA way operasyon ang ahensya sa ilang dapit. Bisan si PDEA 7 Director Levi Ortiz nipahibawo sa Superbalita Cebu nga wa silay operasyon sa dapit ug wa usab mahasubay sa ilang proseso ang gihimo sa upat ka mga lalake.
Matod ni Rhandel sa interbyu sa Superbalita Cebu nga nag-inusara sa mao nga oras sulod sa ilang balay ang iyang manghod kay ang ilang amahan sayo nga nilakaw kay nag mountain bike sa Barangay Busay, Dakbayan sa Sugbo. Hilig og MTB ang ilang amahan.
Ang ilang inahan toa usab sa lungsod sa Dalaguete, habagatang Sugbo kay namatay ang ilang apohan nga lalake samtang siya natulog sa balay sa iyang hinigugma.
Nadunggan sa ilang mga silingan nga nangayog panabang ang iyang manghod hinungdan nga ang usa niini manginlabot unta, apan giingnan kini nga di manghilabot kay operasyon sa PDEA.
Matod niya nga gikulata ang iyang manghod hinungdan nga nisiyagit og pakitabang.
Ilang nasayran nga gidala si Riel John sa sityo Kabulakan nga duol ra sa ilaha uban usa ka higala niini.
Gawas sa buhatan sa PDEA, ila usab nga giduaw ang police stations sa Mambaling, Sawang Calero ug Pardo, apan wa didto ang ilang manghod.