Nikabat ngadto sa 313 ka indibiduwal or 103 ka pamilya ang nawad-an og panimalay human sa nahitabong sunog sa usa ka compound sa Upper Barangay Tabok, dakbayan sa Mandaue kagahapon sa alas 8:50 sa buntag, Abril 18.
Sa 103 ka pamilya, adunay 69 ka pamilya nga nag-abang ug 34 ang mga tag-iya og balay.
Sigon ni FO1 Denzel Espares sa Mandaue City Fire Station (MCFS), nga sa ilang inisyal nga imbestigasyon nikabat ngadto sa 40 ka mga balay ang naugdaw sa maong sunog.
Gituohang nagsugod ang kayo sa balay ni Nocing Beringel.
Matod ni Espares, nikabat ngadto sa P280,000 ang danyos sa maong sunog.
Wala pa masuta ang hinungdan sa sunog gani, nagpadayon pa ang imbestigasyon sa kabomberohan, sigon ni Espares.
Sa laing pakighinabi, si Dario Tarriman, ang kapitan sa Barangay Tabok, miingon siya sa Superbalita Cebu nga niigo ang sunog sa usa ka compound sa Vega family.
Matod niya, niasoy ang mga lumolupyo sa lugar nga ang hinungdan sa maong sunog mao ang pagbuto sa transformer sa poste diin ang impak sa pagbuto naabot sa maong balay.
Apan, dili pa kini opisyal nga hinungdan tungod ang maong poste nagdistansya og diyutay sa balay diin nagsugod ang kayo.
Gani, sigon ni Tarriman nga magpaabot lang una sila sa imbestigasyon sa kabomberohan.
Kasamtangang, gipapuyo una ni Tarriman ang mga nasunogan sa ilang barangay gym.
Sigon niya nga miresponde na sab ang City Social Welfare and Services (CSWS) aron paghatag og mga pagkaon ug pag-validate sa mga nasunogan.
Nadawat sa MCFS ang alarma alas 8:50 sa buntag ug human ang tulo ka minutos gideklara dayon kini og first alarm.
Gipasaka kini ngadto sa second alarm alas 9:03 ug ngadto sa third alarm pagka alas 9:06 sa buntag.3
Nakontrolar sa kabomberohan ang sunog alas 9:50 sa buntag ug human sa 50 minutos nga pag-overhauling, gideklara dayon kini nga fire out. (KFD)