SUPERBALITA DAVAO

Genoguin: Ang teritoryo sa Pilipinas

Kontra Balanse

Nawala ang isyu sa politika ug pandemya sukad mipuwesto ang 200 ka mga bapor sa China sa Occidental nga bahin sa atong nasud kun West Philippine Sea, pipila lang ka semana human sila manghatag og libreng Sinovac nga bakuna para sa coronavirus disease 2019 (Covid-19).

Pebrero 28, 2021, ilang gihatud sa atong nasud ang 600,000 ka doses nga bakuna, nga mapasigarbuhon nga gitagbo sa atong presidente, Rodrigo Roa Duterte.

Apan usa ka semana ang milabay, Marso 8, 2021, namatikdan gilayon sa atong Philippine Coast Guard nga gipuwestohan dayon nila ang atong Exclusive Economic Zone (EEZ).

Unang pangatarungan sa mga tinugyanan sa mga Chinese vessels nga kuno mitago lang sila sa maong dapit tungod sa daut nga panahon. Apan human miiway ang daut nga tiyempo, nagpabilin gihapon sila sa maong lugar ug wa na magpagawas og mga katarungan.

Human gisulayan ug pagpalayas sa Department of National Defense (DND), misibat ang pipila, pero nagpabilin pa gihapon sila sulod sa atong EEZ.

Karon nagpunay og putak-putak ang mga oposisyon ngano daw nga wala magpakabana ang atong presidente ug kanunay gisalig kang Delfin Lorenzana sa Department of National Defense (DND), ug kang Teodoro Locsin sa Department of Foreign Affairs (DFA).

Nakalimot ning mga tawhana nga ang mga miyembro sa gabinete, sila ang alter ego sa presidente? Ug karon mitubag na si Presidente Duterte nga dili siya gusto'g gubat. Sulbaron kini pinaagi sa "bilateral talk", istoryahan sa duha ka leader. Apan ug gusto gyud og giyera ang America, sila maoy unang magpabuto, og giyera man gyud ang ilang gusto.

Kon puwede dili angay paminawon ang mga yelowhan kay kining mga tawhana, walay gibuhat sa ilang panahon, gipasagdan nila ang China nga magmugna og lain pang artificial island pinaagi sa pagguba sa mga kabungturan sa Zambales ginamit ang yuta sa mga isla karon sa gikabangian nga West Phlippine Sea.

Mas maayong hulaton nato og unsay resulta unya, kon mag-atubang na kining duha ka ka presidente dili usa kini i- publiko ug mas maayong dili nato pangunahan.

Kon ang mga plano sa milabay nga panahon nga tugtan ang China nga maoy mag-extract sa mga minerales nga anaa sa atong EEZ sama sa mga gas, lana ug uban pa, ug modawat sila sa 40 porsiyento, ug 60 porsiyento ang ato, nganong dili man ta mosugot? Basta dili lang magkagubat? Sayon kaayong litukon ang giyera pero kon mahitabo na, ambot og unsay mahitabo sa atong nasud.

Ang teritoryo sa Pilipinas adunahan sa mga rekursos naturales sa kayutaan man ug kadagatan, mao nga gikaibgan kini sa mga higanteng mga nasud sa kalibutan. Ug kay wala man tay igong katakus sa pagpakigharong sa kanila, mas maayong ipaagi na lang sa maayong pagsabot-sabot kay sa makiggubat.

Kon mao ni ang tumong sa atong presidente, ato na lang siyang suportahan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph