DAVAO DE ORO - Gituohan sa kapulisan nga personal nga bikil ang motibo sa pagpusil patay sa 22-anyos nga babaye atubangan sa iyang kapuyo sulod sa ilang balay didto sa Purok 1, Barangay Bukal, Nabunturan alas 8:30 sa gabii, Sabado, Abril 17, 2021.

Ang biktima giila nga mao si Marevil Dacullo Gumanit, 22, molupyo sa nahisgutang dapit.

Base sa inisyal nga imbestigasyon, gibutyag sa kapuyo nga si Aljun Lendio Lastimoso, 28, minero, nga padulong na unta sila mangatulog niadtong higayona. Apan kalit lang nisulod ang suspek nga si Flesisimo Roble, hamtong ang pangedaron, minero sab ug taga Purok 5, Bukal sa nahisgutang lungsod, uban sa wa mailhing kauban.

Kalit matud pang mihulbot sa iyang armas ang suspek ug dayong pusil sa biktima tumong sa ulo.

Matud pa nga human gipusil ang biktima, ang kapuyo na sab nga si Aljun ang gitionan ug gipusil apan mikagar ang armas sa suspek ug dayong nanagan palayo sa wala masayring direksiyon.

Sa pakighinabi sa Superbalita kang Police Staff Sergeant Gerald Omerez, imbestigador sa Nabunturan Municipal Police Station, gisulti niini nga sa gihimo nilang hot pursuit operation ilang giadtuan ang balay sa suspek apan wala na kini sa ilang balay.

Patay'ng lawas sa biktima gipahiluna sa Montoya Funeral Homes nga nahimutang sa Purok 16, Barangay Poblacion, Nabunturan.