GIDEKLARAR nga patay na pag-abot sa tambalanan ang usa ka barangay kagawad sa lungsod sa Sta. Margarita, Samar human naghikog gamit ang pisi.
Ang insidente nahitabo mismo sulod sa panimalay sa namatay nga si Rey John Recamara, 36, minyo, barangay kagawad ug nagpuyo sa P-6, Barangay Palale, Sta. Margarita.
Alas 5:30 sa hapon, Sabado, Abril 17, 2021, ang kapulisan sa Sta. Margarita nakadawat og tawag gikan ni Barangay Kapitan Luisito Lazaro bahin sa maong insidente.
Dali nga girespondihan sa kapulisan ang tawag ug naabtan nila sulod sa balay ang nagbitay nga lawas sa opisyal nga patay na.
Naghigot kini og pisi sa kesame ug ang pikas gihikot sa iyang liog.
Base sa imbestigasyon, ang katabang niini nga si Leofold Morante niadto sa panimalay sa konsehal kay magpatuktok sa mga manok.
Nagsige kini og sampit apan walay nitubag busa nisaka kini sa kural nga kawayan ug pagtan-aw niya sa bintana, nakit-an niya si Recamara nga nagbitay hinungdan nga nangayo kini og tabang sa barangay.
Si Kapitan Lazaro dali nga nitawag sa mga pulis aron masusi ang nahitabo.
Nakit-an usab sa kapulisan sa crime scene ang usa ka basiyo sa beer ug duna usab suicide note nga gibilin ang biktima.
Sa paghimo ning balita, wala pa gibutyag sa kapulisan ang sulod sa mao nga suicide note.
Walay nakita ang kapulisan nga foul play sa kamatayon sa opisyal apan mohimo gihapon sila og dugang imbestigasyon.
Gidala sa Bornec Funeral Homes si Recamara. (JKDP)