GI-IMPOUND sa Traffic Enforcement Agency of Mandaue (Team) ang 41 ka mga sakyanan karong buwana human mibiyahe bisan og walay mga rehistro.
Si Edwin Jumao-as, executive director sa Team, niingon sa Superbalita Cebu nga na-impound nila ang 37 ka mga motorsiklo, duha ka awto, ug duha ka trak, atol sa ilang mga random checkpoint karong buwana.
Matod niya, pipila sa mga driver sa na-impound nga mga sakyanan, wala mahibawo nga ilang sakyanan walay rehistro tungod gihuwaman ra kini nila o ang pagmaneho niini ang ilang panginabuhi.
Gani matod niya, usa sa driver sa truck nga nasakmit ug gipanag-iya sa usa ka soft drink company nga wala siya mahibawo nga kini walay rehistro.
Apan, kadaghanan sab sa ilang nasakmit personal nga gigamit ug bisan wala kini rehistro, gimanehoan gihapon kini ug namasin nga dili madakpan.
Pipila sab sa mga motorsiklo, gigamit sa mga tag-iya isip habalhabal.
Matod ni Jumao-as, gibawal pa gihapon sa dakbayan ang pagmaneho sa mga hablhabal. Gani, isyuhan kini nila og citation ticket nga adunay multa nga P1,000.
Sigon niya nga sa ilang nahibaw-an ang Angkas lang ang gihatagan og awtoridad sa Land Transportation Franchising and Regulatory Board nga maka-operate na balik.
Sa 41 nga nasakmit nga dili rehistradong mga sakyanan, mga 20 pa ka mga sakyanan ang nagpabilin sa kustodiya sa Team, ingon ni Jumao-as.
Niadtong Marso 2021, gipahamtang sa Team nga usa sa ilang rekistos aron makuha na ang gi-impound nga sakyanan, kinahanglan nga magpakita og dokumento nga ang sakyanan giparehistro na nila.
Kini aron makuhaan na ang gidaghanon sa mga nagdagan nga mga sakyanan nga walay rehistro sanglit sa lima ka porsiyento sa madakpan sa Team, walay rehistro o walay lisenya, dugang ni Jumao-as. (KFD)