DUHA ka tawo ang gipanigbas sa usa ka lalake nga naghuramentado sa Sitio Nazareth, Barangay Paypay, lungsod sa Daanbantayan niadtong Dominggo, Abril 18, alas 7:00 sa buntag.
Si Ernesto Lederos Nulla, 78, minyo ug residente sa nahisgutang lugar, patay na dihang naabot ang kapulisan human nakaangkon og dakong samad sa ulo ug lawas.
Samtang, naangol iyang pag-umangkon nga si Elizabeth Marikit Edar, 56, minyo ug nagpuyo usab sa nahisgutang lugar. Si Elizabeth naputlan sa iyang upat ka kuyamoy sa wala nga kamot.
Ang suspek mao si Sammy Nulla Arreglamos, 45, kinsa nasikop sa niresponding mga pulis.
Si Police Senior Master Sgt. Noel Belicoria, imbestigador sa Daanbatyan Police Station nga nahinabi sa Superbalita Cebu, nagkanayon nga ang suspek dunay sakit nga nervous breakdown.
Matod niini, ang suspetsado nag-inusara nalang kini human gibiyaan sa iyang pamilya kay walay trabaho kay palahubog.
Giingong kanunay ang suspek nga mag-inom og ilimnong makahubog.
Niadtong Sabado, Abril 17, pa kini nag-inom unya nitukar ang nervous breakdown niini misaka sa bukid.
“Basta masul-an ni siya, mosaka sa bukid kay mahadlok siya duna daw tawo nga mopatay kaniya,” dugang ni Belicoria.
Ang mga kabanay kalit lang nakugang kay Dominggo sa buntag naabot ang suspek nga nikanaog gikan sa bukid.
Apan nagdala kini og sundang ug giatake niya ang iyang kabanay hinungdan nga dali nga nakapanira sa pultahan sa atubangan ug wala makasulod.
Apan nagpadayon sa iyang pag-amok ug nilipot ngadto sa panimalay diin didto ang biktima nga 78 anyos nga si Ernesto.
Gumikan kay hinay na si Ernesto, naabtan kini ug natigbasan makadaghan ka higayon nga maoy hinungdan sa kamatayon niini.
Walay nahimo ang mga kabanay ug mga silingan kay nakalitan sa panghitabo.
Ang pag-umangkon sa biktima nga si Elizabeth, kinsa ig-agaw sab sa suspek, nangita sa tiguwang didto sa likod, apan nasugatan siya sa suspetsado ug siya na usab ang giatake.
Si Elizabeth nakamaniho sa pagsagang sa iyang walang kamot dihang gitigbas.
Apan naharos sa pagkaputol ang upat ka kuyamoy.
Diha ang mga puis ug mga tawo sa lugar nagtinabangay sa pagsikop sa suspetsado.
“Libog kaayo siya ikaestorya, Sir, kay magbalikbalik nga duna kunoy tawo nga buot mopatay niya wala pa mauli sa nervous nga sakit,” sumala ni Belicoria.
Dugang niini nga ang suspetsado walay trabaho ug sugo-sugoon sa mga silingan.
Unya kon makakwarta,
mag-inom gilayon bisan wala pay kaon.
Wa sab kiniy record nga maggamitag drugas gawas sa pagkapalahubog.
Kasong murder ug frustrated murder ang giandam sa kapulisan batok sa suspek. (GPL)