MAGSUGOD na ang dakbayan sa Sugbo og bakuna sa senior citizens ug una nga bakunahan ang senior citizens nga nagpuyo sa Barangay Mambaling ug Barangay Mabolo sugod Lunes, Abril 19, 2021.
Ang senior citizens ubos sa Priority Code A2.
Ang Robinsons Galleria ug University of Cebu (UC) Banilad gihapon ang gamiton nga vaccination sites.
Si Cebu City Councilor David Tumulak miingon nga kuhaon gamit ang bus ang senior citizens gikan sa pick up area sa mga nahisgutang mga barangay.
Ang taga Mambaling bakunahan sa Robinsons Galleria ug ang taga Mabolo bakunahan sa UC Banilad. Ang mga taga barangay ang magpatapok sa mga senior citizen ngadto sa pick up point ug kuhaon ang first batch alas 8:00 sa buntag.
Inig abot sa ikaduha nga batch, kuhaon nasad ang mga nauna nga batch ug ihatod pagbalik sa ilang mga barangay.
Gi-discourage sa ospital ang pagdala og kuyog apan kon kinahanglanon man gani, istrikto nga dili bakunahan og apil ang kuyog.
Si Cebu City Health Department (CHD) officer-in-charge Jeffrey Ibones miingon adunay 4,000 ka doses sa Sinovac ang naabot sa dakbayan alang sa senior citizens.
Istrikto nga ipatuman sa dakbayan ang no walk-in policy. (JJL)