NAMATAY ang asawa ug grabe ang kahimtang sa bana human natumbahan sa dakong punoan sa lubi samtang nangatulog ang magtiayon sa alas 2:30 sa kaadlawon sa Dominggo, Abril 18, sa Sitio Manlayag, Barangay Panalipan, lungsod sa Catmon.
Si Olivia Popoy, 47, minyo trabahante sa dakong kompaniya sa dakbayan sa Danao ug nagpuyo sa naasoy nga dapit, nakabsan sa kinabuhi.
Grabe ang iyang bana nga si Dennis Popoy, 45, mag-uuma ug nakaangkog kadaot sa lawas.
Si Police Corporal Vergil Ortiz sa Catmon Police Station nga nahinabi sa Superbalita, nagkanayon nga ang magtiayon uban sa ilang anak nga si Josh, miadto sa bukid niadtong Sabado sa hapon, Abril 17.
Ang ilang umahan layo ra sa ilang panimalay diin duna silay payag.
Sayo sila miadto sa bukid Sabado sa hapon kay inig ka sayo sa buntag mang-harvest sila sa mga tanom nga patatas.
Ang magtiayon nahinanok na sa pagkatulog kay bugnaw ang panahon.
Kusog ang hangin niadtong higayuna, unya uwan-uwan nga dinala sa bagyong si ‘Bising’.
Kalit nga milagubo ang payag ug nadat-ugan sila sa dakong punoan sa lubi nga dunay daghang bunga.
Ang punoan sa lubi natumong gyud sa dughan sa managtiayon, hinungdan nga namatay si Olivia.
Samtang ang bana nadali sa pagdala sa tambalanan.
Ang mga residente sa dapit ug mga pulis nagtinabangay sa pag-rescue sa mga biktima.
Ang ilang anak ngasi Josh naluwas atol sa insidente ug wala maapil dihang natumba ang lubi. (GPL)