Barrita: Bakunahan tanan sa Visayas sa 2021

Barrita: Bakunahan tanan sa Visayas sa 2021

ADUNAY maayong balita alang niadtong nabalaka kon kanus-a pa sila mabakunahi batok sa Covid-19. Target sa Office of the Presidential Assistant for the Visayas (Opav) nga mabakunahan batok sa Covid-19 ang tanang mga lumolupyo sa Visayas ning tuiga.

Gipahibawo kini ni Presidential Assistant for the Visayas Michael Lloyd Dino atol sa rollout sa Visayas Covid-19 Vaccination manual niadtong Miyerkules, Abril 14, 2021 sa Visayas Covid-19 Vaccination Operations Center (VVOC) sa Oakridge Business Center sa Mandaue City.

Duna na tay Visayas Covid-19 Vaccination manual. Duna na tay Visayas Covid-19 Operations Center. Ang kuwang na lang mao ang bakuna. Kay sumala ra ba sa mga taho, 87 porsiyento sa tanang mga bakuna batok sa Covid-19, gihakop sa mga datong nasod.

* * *

Nangusog si Dino nga adunay igong supply sa bakuna alang sa tulo ka mga rehiyon sa Kabisay-an. Giawhag niya ang mga buhatang rehiyonal sa Department of Health sa Central, Eastern ug Western Visayas sa pagduso sa Opav sa gidaghanon sa mga bakuna nga ilang gikinahanglan matag semana.

Gipahimangnoan sab niya ang mga kagamhanang lokal nga seguraduhon nga ilang mapatuman ang han-ay ug maayong programa sa pagbakuna pinaagi sa paggamit sa VVOC vaccination manual.

Ang manual giandam ni Inter-Agency Task Force (IATF)-Visayas Chief Implementer Mel Feliciano uban sa pakigtambayayong sa Opav ug Department of Health Region (DOH) 7 Regional Director Jaime Bernadas.

* * *

Sakto ang pangandam sa Opav alang sa mass vaccination. Apan kon maoy target nga mabakunahan ang tanan sa di pa matapos ning tuiga, angay kombinsihon ang tanan nga magpabakuna batok sa Covid-19 aron makab-ot ang gitawag nga herd immunity.

Ang mga survey nga gihimo kon magpabakuna ba ang mga Pilipino, nagpakita nga mayoriya ang di gustong magpabakuna. Naa gihapon ang kahadlok sa mga tawo batok sa bakuna. Pun-an pa sa siging balik-balik sa TV nga ipataop gyud ang dagum sa bukton ug sa mga report sa blood clots ug ubang adverse effects.

Tingali gikinahanglan, sa di pa moabot ang daghang bakuna nga sa pagkakaron wa pay klaro kon kanus-a, mao ang usa ka massive information campaign nga magkombinsir sa katawhan nga epektibo ug luwas ang bakuna batok sa Covid-19.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph