MAAYO ang intensiyon ni Cebu Governor Gwendolyn Garcia sa pagwagtang sa multa niadtong masakpan nga nakalapas sa minimum health standard sama sa wala pagsul-ob sa face mask ug face shield. Ang uban man sad gud nga local govetnment units (LGUs) sa lalawigan mahal kaayo og multa, ang kabus nga limtanon, mahiagom gyud sa balaud.
Pikas bahin, ang lagda o balaud nga walay multa sa makalapas huyang usab kini. Maayong pag-us-osan seguro ang multa o mohimo og community service. Ang subrang pagluag sa pagpatuman sa minimum health standard dili maayo sa kinatibuk-an samtang nagpabilin ang hulga sa coronavirus disease 2019 (Covid-19).
Matod sa gobernador, mahimo lang nga pasidan-an ug dili na pasakaan og kaso lakip na pamultahon ang masakpan nga walay tabon sa ilang ilong ug baba. Dili kaha kini maabusohan? Kini ra ba intawong uban, maayo modala og palusot.
Dunay maayong sugyot ni Police Brigadier General Ronnie Montejo sa Police Regional Office (PRO) 7 mipagawas siya og kamandoan sa mga hepe sa kalungsuran nga kon makasugat silag mga tawo nga wala mag-face mask, badlungon lang kini ug hatagan kinig face mask. Mas arang-arang kini nga pamaagi.
Matod niya, nga sa iyang opisina lakip na sa supply offices sa kapulisan sa probinsya sa Sugbo, adunay daghang mask nga mahimong maoy ipang apud-apod niadtong mga tawo nga walay ikapalit. Lakip sa iyang mando sa iyang mga personnel sa probinsya nga kon adunay makit-an nga tawo nga nagsul-ob man sa face mask apan wala kini matarong, hinayon lang kini sa pagpasabot nga kinahanglan nga saktohon sa paggamit.
Dugang ni Montejo nga dili pa gihapon angayan nga mokompiyansa karong mga panahona nga kinahanglan pa nga ipatuman ang lagda sa Inter-Agency Task Force (IATF) labot sa minimum health standard bisan na namatikdan nga dunay pagkunhod sa kaso sa Covid-19 sa dakbayan ug lalawigan.
Nakahinumdom ba kamo sa pagkusog sa Covid-19 sa Sugbo? Ang sunodsunod nga kuwarentina ug lockdown? Dili gyud maayong kasinatian. Seguradong way usa kanato nga nangandoy nga mabalik kini. Buang lang tingali. Busa, dili maayong pasubrahaan og pagluag ang minimum health standard batok sa Covid-19.