BISAN paman wa ang ilang saligando nga si Lebron James ug Anthony Davis, nakamaniho ang Los Angeles Lakers og impresibong kadaogan batok league-leading Utah Jazz sa overtime, 127-115, sa National Basketball Association (NBA) didto sa Staples Center, Los Angeles kagahapon.
Ang bag-ong miyembro sa Lakers nga si Andre Drummond maoy mikastigo sa Jazz pinaagi sa iyang 27 puntos, walo ka rebounds, tulo ka assists, duha ka steals ug usa ka block.
Ang role players nga si Dennis Schröder ug Kentavious Caldwell-Pope mitunol pud og saktong suporta alang sa Los Angeles. Si Schröder mikamada’g 25 puntos ubanan sa walo ka assists samtang si Caldwell-Pope miiskor pud og 25.
Si Schröder maoy midala sa duwa ngadto sa overtime human siya makalusot sa depensa ni Royce O’Neale alang sa usa ka layup nga maoy nakatabla sa duwa 110-all sa nahabiling 0.3 segundos sa fourth quarter.
Wa na kapugngi ang Los Angeles sa overtime diin mipuntos kini’g 17 og gilimitahan lamang sa 5 puntos ang Jazz.
Matod sa two-time All-Star bigman Drummond kinsa misulod sa Lakers niadtong Marso 29 nga nagkataas na ang ilang chemisty sa iyang teammates.
Ang Jazz miduwa nga wala ang ilang starters nga si Donovan Mitchell, Mike Conley ug Rudy Gobert. Si Mitchell dili makaduwa og usa ka semana tungod sa sprained right ankle nga iyang nakuha sa ilang duwa batok Indiana Pacers.
Ang Pinoy nga si Jordan Clarkson maoy nangulo sa Jazz pinaagi sa iyang 27 puntos, samtang miamot og 20 puntos si Ersan Ilyasova, si Joe Ingles midunol og 20 puntos ug 14 ka assists ug si Bojan Bogdanovic miiskor og 19.
Adunay 1,710 fans ang mitan-aw sa duwa kay gitugotan naman nga makabalik ang limitado nga fans sa Staples Center ubos sa strikto nga health protocol sa California.
Sa laing mga duwa, gipilde Washington Wizards ang Detroit Pistons, 121-100; gisungag sa Chicago Bulls ang Cleveland Cavaliers, 106-96; gilupig sa Boston Celtics ang Golden State Warriors, 119-114; gibuno sa Memphis Grizzlies ang Milwaukee Bucks 128-115; ug gipabugnaw sa San Antonio Spurs ang Phoenix Suns, 111-85. (RSC)