GIBUNTOG sa MJAS Zenith-Talisay City Aquastars ang ARQ Builders-Lapu-Lapu City Heroes, 84-75, aron ibulsa ang ilang ikaupat nga daog sa 2021 Chooks-to-Go VisMin Super Cup sa Alcantara Civic Center, lungsod sa Alcantara niadtong Sabado sa gabii, Abril 17, 2021.

Nagpabiling walay pilde ang Aquastars ug miabanti ngadto sa 4-0 (win-loss) record aron huptan ang liderato sa team standings sa VisMin Super Cup Visayas leg, samtang ang Heroes nakatilaw sa ilang unang pilde sulod sa tulo ka duwa.

Ang bigman nga si Jhaymo Eguilos, shooting guard Patrick Cabahug ug point guard Paulo Hubalde maoy nangulo sa kadaogan sa Talisay City pinaagi sa ilang double figures.

Si Eguilos misakmit og 18 puntos ubanan sa walo ka rebounds, ang kanhi Adamson player nga si Cabahug miamot og 17 puntos, lima ka rebounds, upat ka assists ug duha ka steals, samtang ang ex-PBA player nga si Hubalde nimugna’g 16 puntos, pito ka rebounds ug siyam ka assists.

Si Cabahug maoy mipahilom sa Lapu-Lapu City pinaagi sa iyang tres ug layup nga maoy nakahatag og labaw sa iyang team sa uwahing bahin sa fourth quarter.

Bisan paman wala ang ilang key players, nakahimo sa pagsikit ang Heroes og gani nakalabaw pa kini, 67-64, sa sayong bahin sa fourth quarter.

Apan wana makalihok ang Lapu-Lapu City sa uwahing bahin sa duwa ug nabiyaan kini sa Talisay City.

Si Jerick Cañada mihimo’g 10 puntos, 15 assists ug walo ka rebounds, samtang si Vincent Minguito ug Cris Regero miiskor og 13 ug 12 puntos alang sa Lapu-Lapu City.

Ang Lapu-Lapu City miduwa nga wala si Jojo Tangkay, Reed Juntilla, Monbert Arong, Dawn Ochea ug Ferdinand Lusdoc nga gipang-suspenso sa nahabiling mga duwa sa first round.

Sa laing bahin, mipabuhagay og 18 puntos, unom ka rebounds ug siyam ka assists si Joemari Lacastesantos aron aswaton sa kadaogan ang Tabogon Voyagers batok Dumaguete City, 86-78, sa main game.

Ang Tabogon nalubong og 12 puntos sa first half apan miinit kini sa third ug fourth quarter aron makabalik sa duwa sa paningkamot ni Lacastesantos, Peter De Ocampo, Normel Delos Reyes ug Arvie Bringas.

Si De Ocampo mitampo’g 15 puntos, si Delos Reyes midugang og 14 puntos, tulo ka rebounds ug duha ka steals samtang ang bigman nga si Bringas mihatag og 11 puntos, upat ka rebounds ug tulo ka assists.

Si Ronald Roy nakahimo’g 21 puntos ug ang kanhi Most Valuable Players sa Cebu Schools Athletic Foundation Inc. (Cesafi) Jaybie Mantilla mimugnag 15 puntos alang sa Dumaguete City.

Misaka sa ikaupat nga pwesto ang Tabogon dala ang 2-2 nga baraha samtang ang Dumaguete City nahagsa ngadto sa ikalima nga pwesto bitbit ang 1-3 rekord.

Mopadayon ang aksiyon sa Martes, April 20, diin magabot ang Talisay City ug Tabogon sa first game alas 4 sa hapon samtang magsangka ang KCS Computer Specialist-Mandaue City ug Lapu-Lapu City sa main game alas 7 sa gabii.