SUPERBALITA DAVAO

3 naniudto natumbahan og lubi

Google map

HAGONOY, Davao del Sur - NAKALAS ang kinabuhi sa usa ka babaye samtang anaa sa talandugong kahimtang ang duha niya nga kauban dihang kalit natumba ang usa ka punoan sa lubi sa Hagonoy, Davao del Sur udto sa Dominggo, Abril 18, 2021.

Subay sa taho gikan sa Hagonoy Municipal Police Station, nailhan ang namatay nga si Dean Shenly Mamad, 20, molupyo sa Purok 4, Barangay Sacub sa lungsod.

Padayon sab nga giatiman sa bay tambalan ang igsuon niining si Dominic Mamad, 19, ug kauban nga si Deaniah Chillswayne Mosong, 18, taga Barangay Maliit Digos sa lungsod.

Sumala ni Lieutenant Nilo Emborgo, hepe sa Hagonoy Municipal Police Station, nagkaon sa ilang paniudto ang mga biktima dihang kalit natumba ang punoan sa lubi tungod sa pagharos sa kusog kaayong hangin.

Daling miresponde ang mga rescuers sa lokal nga panggamhanan sa Hagonoy apan gideklarang dead on arrival si Dean Shenly paghidangat sa Davao del Sur Provincial Hospital.

Sa pagsuwat ning balita, padayong nakasinati og kusog nga hangin ang nagkadaiyang kalungsuran sa probinsiya nga gituohang hinungaw sa Bagyong Bising.

Kini sab maoy hinungdan sa pagkawagtang sa kuryente sa linya sa Davao del Sur Electric Cooperative (Dasureco) didto sa Barangay Kapatagan, Digos City niadtong Dominggo sa hapon.

Hinuon, nahibalik na sa normal ang sitwasiyon sa Kapatagan pasado alas 2 sa hapon.

Sumala sa Dasureco nga ang grounded pin insulator didto sa Purok Mabolo sa Barangay Binaton maoy hinungdan sa kapin usa ka oras nga brownout.

Nagpasidaan ang mga awtoridad sa publiko nga magpalayo sa mga dagkong punoan sa kahoy aron di mameligro ang ilang kinabuhi tungod sa padayong paghapak sa kusog nga hangin.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph