Usa ka babaye ang gipusil-patay sa Sityo Bayanihan, Barangay Basak Pardo, Dakbayan sa Sugbo sa sayong gabii kagahapon, Abril 19, 2021.
Sumala sa kapulisan, ang biktima giila sa iyang bana nga si Ritchie Nepomuceno, 35, nagpuyo sa Deca Homes sa Tungkil, Lungsod sa Minglanilla.
Si Nepomuceno naigo sa walang bahin sa mata sa wa pa matino nga kalibre sa armas.
Sa pakighinabi sa kapulisan sa bana nga si Danilo, wala kini masayod nganong gipusil ang iyang asawa.
Apan giangkon niya nga wala na sila mag-ipon ni Ritchie ug duna silay duha ka anak.
Gibutyag sa bana nga binayloay sila og text messages, matod pa, makig-uli na si Ritchie kaniya human wala na kini trabaho.
Si Ritchie nahimong kontrobersiyal human nisumbong batok sa 11 ka mga sakop sa Sawang Calero Police Station sa Cebu City niadtong Marso 2021 human gi-raid ang iyang balay tungod sa alegasyon nga aduna mga armas nga gitago, apan walay nakita nga mga armas ang mga pulis.
Matod sa iyang reklamo, gidala siya sa police station niadtong Marso 10, 2021, gikilkilan og P170,000 ug gilugos sa usa ka pulis.
Ang Integrity Monitoring and Enhancement Group Visayas Field Unit (IMEG-VFU) nisusi sa reklamo batok nila ni PSSg Celso Colita, PCMS Eric Edgar Emia, PCpl Rochelito Mabulay, PCpl Emmanuel Martinez, PSSg Joseph Alcoseba, PSSg Michael Rhey Cabizares, PCpl Ejill Ferrolino, PCpl Carlo Irizari, PCpl Junel Pedroza, PCpl John Carl Aceron ug PCpl Georny Abrasado sa Pasil Police Station ubos sa City Police Office.
Atol ning pagsuwat, nagpadayon pa ang imbestigasyon sa pagpusil-patay ni Ritchie. (AYB)
RELATED STORY:
11 ka pulis gitangtang