Nasagmuyo ang presidente sa Chooks-To-Go nga si Ronald Mascariñas sa desisyon sa Games and Amusement Board (GAB) nga isuspenso ang Mindanao leg sa Pilipinas VisMin Super Cup tungod sa kontrobersya nga miulbo sa usa ka duwa sa kasamtangang nagpadayon nga Visayas leg.
Ang duwa sa Visayas leg tali sa ARQ Builders Lapu-Lapu City Heroes ug Siquijor Mystics niadtong Abril 14, 2021 sa Alcantara Civic Center sa lunsod sa Alcantara, Cebu gidudahan nga adunay nahitabong game fixing gumikan sa tataw nga tinuyo nga mga sipyat sa freethrows ug layups.
Isip silot, ang mga nag-organisar sa liga ning-ban sa Siquijor ug sa tanang mga magduduwa niini unya ningpahamtang og multa ug suspensyo sa ubay-ubay nga mga magduduwa sa Lapu-Lapu ug coaching staff niini.
Apan alang kang Mascariñas, dili makiangayon ang desisyon sa GAB nga isuspenso ang Mindanao leg tungod sa nahitabo sa Visayas leg.
“If wrongful acts committed in a single match in Cebu, and not by any means attributable to all the teams playing in the Visayas leg, did not stop the games there, by what contorted stretch of logic or the imagination did it justify the wholesale suspension of the games in Mindanao?” opisyal nga pamahayag ni Mascarinas.
Gidayeg man tuod ni Mascariñas ang gihimong lakang sa GAB sa nahitabo sa Visayas leg apan dako siyang supak sa gihimo niini sa Mindanao leg, nga sugdan inig human pa sa Visayas leg.
Ang teams nga magkombati sa Mindanao leg nagagikan sa Basilan, Cagayan De Oro, Zamboanga, Pagadian, Roxas, Sindagan, Tawi-Tawi, Valencia City, ug Ozamiz City.
“Let us hope GAB reconsiders its decision,” dugang ni Mascarinas. (ESL)