Pormal na nga nakakuha og luna si weightlifter Hidilyn Diaz sa Tokyo Olympics sa iyang pagsalmot sa Asian Weightlifting Championships sa Tashkent, Uzbekistan niadtong Dominggo sa gabii, Abril 18, 2021.
Ang Top 8 weightlifters sa ilang kategoriya mao ang masulod sa Summer Games basi sa weightlifting rules sa Tokyo Summer Games. Si Diaz naghupot sa world No. 2 nga rank.
Sa Asian Weightlifting Championship mitali si Diaz og 94kg snatch ug 118kg clean and jerk nga maoy nagbutang kaniya sa ikaupat nga puwesto.
Nadepensahan ni Chinese Liao Quiyun ang iyang Asian Championship nga titulo human kini mialsa og 98kgs sa snatch ug 124 sa clean and jerk, samtang ang iyang kababayan ug kanhi two-time world champion Li Yajun maoy mibulsa sa silver medal nga adunay 101kg snatch ug 120kg lifts.
Si Uzbek lifter Muattar Nabieva maoy midaog sa bronze medal pinaagi sa 99kg snatch ug 114kg clean and jerk.
Bisan wala naka-podium si Diaz, wa kini makaapekto sa iyang poruhan sa Olympics kay tungod anaa man siya sa Top 2 sa ranking.
Ang kinahanglan lang ni Diaz mao ang pagsalmot sa duwa tungod sa minimum nga unom ka Olympic qualifying events nga angay apilan sa usa ka weightlifter para sa Olympics.
Mao kini ang ikaupat nga higayon nga nakasulod si Diaz sa Olympics. Niadtong 2016 gihatagan ni Diaz og dakong dungog ang nasod sa iyang pagdaog sa silver medal sa Rio Olympics sa Brazil.
Dako ang tahas karon sa 30-anyos nga lumad Zamboanga City kay tinguha niini nga madaog ang unang gold medal sa Pilipinas sa Olympics.
Sa interbyu sa Olympicchannel.com, gibatbat ni Diaz nga ang Asian Championship nagsilbing tune-up game kaniya alang sa Olympics nga gikatada sa Hulyo 23 ngadto Agosto 8 sa Tokyo, Japan.
“I have been continuously working hard to achieve that dream of winning a Games gold for the Philippines. I hope all my sacrifices will pay off,’’ sigon ni Diaz.
Si Diaz ang ikapito nga Filipino nga nasulod na sa Tokyo Olympics uban sa mga boksidor nga si Eumir Marcial, Irish Magno, Nesthy Petecio ug Carlo Paalam, world champion gymnast Carlos Yulo ug pole vaulter EJ Obiena. (RSC)