Pangnegusyo o libre ba kaha kining tubig sud sa Bagong Buhay Rehabilitation Center (BBRC)? Gigamit kaha alang sa kaayuhan ang ginansya sa negusyo sud sa BBRC? O gibahinbahin lang sa mga bentahuso nga mga sakop sa BJMP?
Walay nagpakabana kabahin niining maong pangutana labi na sud og usa ka prisohan. Mga badlungon bitaw na sila. Dayon, ang nagbantay kanila mao ang naadunahan kay namentaha ang mga kagwang.
Di binuang ang ilang presyo. Kon gallon nga puno og tubig, kining sudlan og tubig sa gawas nga mag-presyo og P10, tag-P40 intawon ang pangkaligo. Moabot og P65 ang gallon kon ang tubig pang-inom.
Tipik kini sa mga produkto nga baligya sa tindahan sa BJMP kun Bureau of Jail Management and Penology (BJMP).
Unsay capital sa mga BJMP sa ilang tubig? Unsay dag-anan sa mga kabus nga priso batok sa mga abusadong BJMP? Di na tingale dutlan og gaba kining mga tawhana kay wa pa man mangakimay.
Mao nga mangutana kita sa uban natong mga ahensiya sa kagamhanan.
Way labot sa bantayanan sa mga tinugyanan sa Department of Trade and Industry (DTI) kining pamentaha sulod sa BBRC?
Mas interesado ko sa mga opisyal sa Syudad sa Sugbo. Nagpakabana ba kining atong mga opisyal o naghulat lang nya inig abot sa kampanya sa eleksyon sa 2022?
Unsa may nabuhat sa atong mga opisyal sama nilang Mayor Edgar Labella ug Bise Mayor Mike Rama? Unya daghan kitag mga konsehal nga manghatag unya og P200 inig abot sa eleksyon.
Duna ba silay nabuhat kabahin sa kahimtang sa mga priso?
Tingale panahon na karon nga molili sab intawon mo sa kahimtang sa mga priso diha sa BBRC. Hunahunaa, moabot kini sila og kapin sa 5,000. Dayon, naa kiniy mga pamilya diha sa gawas.
Kadako sa boto nga imong makuha kon magpakabana lang sa ilang kahimtang. O nagtuo ra gyud kining mga politika sa Syudad sa Sugbo nga pwede ra gyud mapalit kining mga priso inig abot sa ultima ora sa piliay? (DM @anol_cebu.)
Sa miaging lindog, naghisgot ko nga giundang sa BJMP ang pagtunol sa mga bisita og pagkaon ngadto sa sulod. Kini aron mapugos intawon ang mga priso sa pagpalit diha sa overpriced nga baligya sa tindahan sa BJMP.
Karon naghisgot kitag usa sa ilang baligya nga mao ang tubig nga mahal kaayo. Kon way aksyon, lain na sab nga baligya nila atong hisgutan. (DM @anol_cebu.)