Kagahapon, nagsugod na og pagbakuna sa mga senior citizen, nga 60 anyos pataas, dinhi sa Dakbayan sa Sugbo ingon man sa Dakbayan sa Lapu-Lapu. Ang taga Barangay Mambaling nga mga senior citizen didto gibakunahan sa Robinsons Galleria samtang ang taga Mabolo didto sa University of Cebu sa Brgy. Kasambagan campus.
Karon, ang taga Banilad ug Talamban, nga mga senior citizen adto gihapon sa UC campus sa Kasambagan samtang ang taga Barangay Kinasang-an ug Basak Pardo adto gihapon sa Robinsons Galleria. Maayo kay nahatagan og higayon nga mabakunahan na ang mga senior citizen dinhi sa Dakbayan sa Sugbo.
Matod pa ni City Councilor David Tumulak, sakop sa City’s Vaccine Advisory Board (VAB), nga ang mga senior citizen kuhaon ug ihatud og balik sa ilang mga barangay. Konsehal, salamat sa imong paghatag og atensyon sa atong mga senior citizen bisan pa og dunay gamay nga kakuwangan. Pero, wa ni labot sa umaabot nga piliay ha?
Atong mahinumduman nga sa miaging mga semana dunay mga senior citizen nga mireklamo sa social media nga walay miabot sa ilang dapit ug nanoktok sa ilang panimalay aron molista sa ilang mga ngalan alang sa bakuna. Kadaghanan sa adlaw ug semana nia ra man ko sa balay, apan wa ko makabantay nga dunay nanoktok o nanawag gawas sa among balay aron mangutana kon magpabakuna ba mi.
Sa miagi nga buwan, nangutana ko pinaagi sa akong lindog ingon man sa social media kon ang lugar sa gipuy-an nga balay ba o ang gitawag nga “voting residence” ang gibasihan sa dakbayan sa Sugbo sa paglista sa mga senior citizen. Apan wala ko makadawat og tubag gikan sa mga opisyal sa dakbayan sa Sugbo.
Matod ni Cebu City Health Department officer-in-charge Dr. Jeffrey Ibones dunay 4,000 doses sa Sinovac, nga maoy ibakuna sa mga senior citizen. Gani, nagpahimangno si Dr. Ibones nga dili sila motagad sa kadtong mosulod lang sa bakunahan, apan wala malakip sa lista. Ang target sa City Health nga makabakuna sila og 500 ka senior citizen matag adlaw sa Robinsons Galleria ug UC campus. Dunay 14,000 na ka senior citizen nga narehistro online.
Wa diay suporta nga listahan ang Cebu City Health sa mga senior citizen nga ipuli unya sa dili mahatagan kay dunay problema sa panglawas ang narehistro na? Usik man gud ang panahon ug ang bakuna kon dunay pipila ka mga senior citizen nga dili mabakunahan tungod kay dunay problema sa panglawas unya naay daghan nga magpabakuna apan wala marehistro.
Dili ni pagkomparar, apan mao ni ang gibuhat sa dakbayan sa Mandaue pinaagi ni Kon. Nerisa Soon-Ruiz, usa ka doctor, nga naghimo sila og laing lista sa mga tawo nga bakunahan aron mapulihan dayon kadtong dili mahimo nga hatagan sa bakuna tungod kay dunay problema sa panglawas. Ang kadaghanan ra ba sa mga senior citizen duna nay mga gipamatyag sa ilang panglawas. Sa ato pa, dili tanan nga narehistro nga senior citizen matupokan sa bakuna. Di ba duna may edad ang bakuna unya og molapas di na magamit? Sayang ang bakuna kon dili mahatag sa uban.