Kining mga balita kabahin sa kamatayon sa mga tawo human mabakunahan batok sa Covid-19 ug side effects, magmugna og dakong kabalaka, kahingawa ug kahadlok sa katawhan. Pero ato ning klarohon ha nga kining mga kaso sa nangamatay human mabakunahan (dili tungod sa bakuna) wa pa masuta kon ang bakuna bay hinungdan sa ilang kamatayon. Giimbestigar pa karon sa health officials. Pero bisan og wala pa masuta, dili man sab kalikayan nga motumaw ang pagduda ug kahingawa sa katawhan. Sama niadtong outsourced employee sa Vicente Sotto Memorial Medical Center (VSMMC) nga si Sidney Rose Panimdim nga taga Tanke, Talisay nga namatay gumikan sa ataki sa hubak. Samtang hubak ang iyang gikamatyan, wala kaha to siya atakiha gumikan sa bakuna nga Sinovac nga gitusok kaniya?
Didto sa Estados Unidos ug ubang kanasuran, daghan usab ang nangamatay human nabakunahan. Base sa talaan, karong bag-o, adunay 29 ka mga kompirmadong nangamatay human mabakunahan sa Janssen vaccine sa Johnson and Johnson. Gani, ang pagpamakuna gamit ang Janssen ug AstraZeneca gipahunong man sa ubang kanasuran ug dinhi sa Pilipinas tungod usab sa side effects.
Blood clot o dugo nga mobara sa ugat sa utok sa tawo ang findings sa Janssen ug AstraZeneca. Tiaw ba nimo kana. Magpabakuna ta kay aron malikay sa Covid 19, mamatay naman hinuon sa side effects. Aduna say nangamatay nga ginamit ang Pfizer/BioNtech nga hinimo sa Amerika. Buot ipasabot nga dili ta makalikay sa dili maayong epekto.
Gumikan ning maong mga negatibo nga balita, daghan sa mga Filipino ang nagduha-duha nga magpabakuna labi pa ang senior citizens. Labi pa kay dili man diay gihapon kini akapugong nga matakbuyan gihapon ang usa ka tawo sa Covid bisan kon nabakunahan na. Ang konsuwelo lang nga dili magrabihan kon matakbuyan. Samtang dako kaayo og gasto ang atong kagamhanan sa pagpalit ning mga bakuna, apan ang dakong problema unsaon pagkombensi sa katawhan nga magpabakuna gumikan kay mipatigbabaw man ang ilang kahadlok ug kabalaka. (bobbygnalzaro@gmail.com)