Dili mominos sa 16 ka mga sakop sa New People’s Army (NPA) ang mitahan lakip na ang 182 ka mass base supporters ang nanumpa nga mosuporta na sa gobiyerno ug biyaan ang pagsimpatiya sa CPP-NPA-NDF sa Negros Oriental.
Atubangan ni Police General Debold Sinas, ang hepe sa kapulisan lukop nasud, ilang gisaad nga moabin na sila sa gobyerno.
Ang 16 ka NPA sakop sa Southeast Front-Remnants nga naglihok samga lungsod sa Bayawan, Sta. Catalina, Siaton ug Zamboanguita, Negros Oriental.
Ang ilang pagpanumpa gisaksihan usab sa tulo ka mayor nga silang Pryde Henry Teves sa siyudad sa Bayawan, Peve O. Ligan sa Sta. Catalina ug Glenson Alanano sa Zamboanguita.
Gisaad sa maong mga mayor nga hatagan silag livelihood program isip abag sa gobyerno aron maka balik sila sa ilang normal nga panginabuhian.
Ang pagtahan sa maong mga rebelde matod ni Police Brigadier General Ronnie Montejo dako kaayo kinig impact tungod kay mahimong ma piang na ang mga komunista sa maong lugar.
“Labi pa sa mismong municipality ug mga city didto sa Santa Catalina, Bayawan, Siaton ug diri sa Basay dako kaayo kinig impact sa whole Negros ug sa whole Central Visayas, una daghan kaayog masa didto so wala na silay mass base ni surrender na sa atoa,” matod ni Police Brigadier General Ronnie Montejo.
Si Army Major Danny Precioso ang information officer sa Central Command nagkanayon nga maayo nga sinyales ang gihimo sa mga rebelde nga mibalik na sa sabakan sa balaod.
Dili lang sa Negros island diin adunay mi tahan sa ilang kaugalingon nga mga npa lakip na sa ubang lugar sa kabisay-an sama sa Panay island ug Samar provinces.
Nanghinaot siya nga magpadayon pa nga mo balik sa gobyerno ang mga rebelde alang sa kahusay ug kalinaw sa tibuok nasud.
“Nindot ni nga sinyales nga sila nanganaog, kining atung different LGU’s nga midawat pud sa ilaha ug mo tabang sa ilahang pag bag-o sa ilang kinabuhi,” matod ni Major Danny Precioso.
Sa monitoring ni Montejo nga wala na silay nakita nga barangay officials sa tibuok probinsya sa Negros Oriental nga nagpabilin nga sa NPA ilabi na sa bukid.
Gani ang matag lungsod ug siyudad mi deklara na sa maong grupo nga persona non grata nga gi pirmahan sa tanang kapitan nga nagpasabot lang nga wala nay luna sa ilang kabarangayan ang mga rebelde. (AYB)