Sukwahi sa unang plano, hayan posibleng dili na makatambong si Presidente Rodrigo Duterte sa ika-500 ka tuig nga kasumaran sa Kadaugan sa Mactan sa Abril 27.
Kini ang gibutyag ni Lapu-Lapu City Mayor Junard Chan human nga gipahibawo siya sa National Historical Commission kalabot niini kagahapon, Abril 19.
Kon di makatambong ang Presidente, si Executive Secretary Salvador Medialdea ang motambong hulip kaniya.
Matod ni Chan nga usa sa rason sa Presidente mao ang kasamtangang sitwasyon sa coronavirus disease 2019 (Covid-19) sa kaulohan diin kadaghanan sa mga sakop sa Presidential Security Group (PSG) nataptan sa virus.
Gumikan niini, gibutyag ni Chan nga posibleng mausab usab ang mga kalihukan nianang adlawa kon ugaling dili madayon pagtambong si Duterte.
Inay nga sa buntag ipahigayon ang mga kalihukan, hayan ibalhin nila sa alas 4 sa hapon aron mausa na lang sa mga kalihukan usab sa gabii.
Niining paagiha, dili na magbalik-balik ang mga bisita sa ilang pagtambong sa mga kalihukan.
Gipahibawo ni Chan nga bisan og dili makatambong si Duterte, aduna gihapoy mga bisita gikan sa kaulohan sama sa mga senador, mayor, gobernador ug congressman sa ubang lugar nga posibleng madayon og tambong hinungdan nga mao kini karon ang gihan-ay sa mga program coordinator.
Gikatakda usab nga moabot ang mga Cabinet member sa Presidente hilabi na ang mga nabakunahan na sa Covid-19.
Gibutyag ni Chan nga moluwat gihapon og mensahe ang Presidente nianang adlawa pinaagi sa live streaming isip pagduyog sa kasaulogan. Samtang sa pangutana kob moluag ba ang sundon untang health protocol nga ipatuman kon ugaling motambong ang Presidente, gibutyag ni Chan nga ila pa kining gisabotan sa pagkakaron.
Una nang gipahibawo sa mayor nga ang tanang motambong sa kalihukan mopaubos sa antigen test sa dili pa tugotan nga makasulod sa Liberty Shrine sa Barangay Mactan gumikan sa pagtambong sa Presidente. Samtang ang mga bisita gikan sa kaulohan pangayoan usab og negative RT-PCR test, dugang sa anti-gen test.
“Mao nay atong giapil sa meeting with NHC ug Office of the President, if we will still continue with the protocol pero kani atoang performers naka bubble na ni sila and gi-test na sad,” matod ni Chan. (GCM)