Nasikop sa entrapment operation ang usa ka online seller human hubo nga video sa usa ka dalaga gipalukat og P1,000 bugti nga di ipakatap sa social media.
Ang entrapment operation gipahigayon alas 10:30 sa gabii sa Dominggo, Abril 18, 2021, gawas sa usa ka mall sa Brgy. Tabunok, Dakbayan sa Talisay.
Si Karl Alexis Torillo, 18, ulitawo, taga taga Carmen Village, Brgy. Dumlog, Dakbayan sa Talisay, napusasan sa mga sakop sa Regional Anti-Cyber Crime Unit’s (Racu) 7 human iyang gi-blackmail ang 24 anyos nga dalaga nga taga lungsod sa San Fernando, Sugbo.
Ang babaye tinun-an sa usa ka kolehiyo sa Dakbayan sa Sugbo sa kursong edukasyon.
Si Police Staff Sgt. Ronelle Jay Ocariza, imbestigador sa Racu 7 nga nahinabi sa Superbalita Cebu, nagkanayon nga ang babaye nangayo og abag sa ilang buhatan.
Ang babaye nialigar nga gihulga siya ni Torillo nga kon dili mobayad og P1,000 ingon man makigkita kaniya, ipakatap niya ang hubo nga video niini.
Matod ni Ocariza, nga modus ni Torillo nga mangilad sa mga batan-ong babaye kon gusto silang magmodelo.
Kadtong gustong magmodelo, maka-income og insakto kon mo-apply kaniya.
Tulo na ka babaye ang nailad sa Torillo, apil ang biktima.
Human makasumiter ang mga babaye sa ilang hulagway ug video nga hubo, iyahang hashasan ug pagkitaan, i-blackmail, mangayo na og kwarta kay dunay kliyente nga mokuha kanilang dagko og talent fee.
Unang pangayo P4, 000 ngadto sa iyang ma-blackmail.
“Sige na siyag hulga sa biktima nga magkita sila, mobayad og P1,000. Okay na, unya iyahang gamiton, ana-on ba, “ dugang ni Ocariza.
Tungod niini, nangayo og abag ang babaye sa Racu 7 hinungdan nga nasikop si Torillo.
Ang babaye na-depressed sanglit wala siya magdahom, gusto unta siya nga mamahimong modelo naeskandalo na hinuon. Nakuha sa mga operatiba ang selpon ni Torillo diin didto ang ebidensiya. /
Si Torillo niangkon sa mga operatiba sa RACU7 nga nahimo niya ang kremin, tulo na ka mga mo-apply pagkamodelo iyang nabiktima. (GPL)