DAVAO DE ORO -- Angol ang tulo ka mga sakay sa wing van truck human nadaro sa center island sa Daang Maharlika National Highway, Barangay Mipangi, Nabunturan alas 3:10 sa kaadlawon, Lunes, Abril 19.
Subay sa report, nasayran nga nalambigit sa insidente mao ang Fuso Aluminum wing van truck nga dunay temporaryong plaka nga MV 1201-0516789 nga nakarehistro sa pangalang Aliperio Olmido ug gimaneho ni Elmor Areglo Daraug, 29, minyo, molupyo sa Liboo, M'lang, North Cotabato.
Sakay kaniya ang laing duha nga sila si Jessie Morales, 27, molupyo sa Buayan, M'lang, ug Alfredo Reyes, 49, taga Taboo, Bansalan, Davao del Sur.
Subay sa taho nga ang truck naglabigar sa highway gikan sa Cateel, Davao Oriental padulong sa M'lang nga kargado og 440 ka mga sinakong bugas.
Apan pag-abot sa nahisgutang dapit, aksidente kining nadaro sa center island, hinungdan sa pagkaangol sa drayber ug ang laing duha nga sakay niini.
Samtang ang center island ug poste sa kuryente nalampurnas ug napatag. (Dexter T. Visitacion)