LUYO sa nagkaubos mga kaso sa Covid-19 sa Davao City, giseguro nga ang mga business establishments kinahanglan nga padayong mopatuman sa mga basic health and safety measures aron masegurong maprotektahan ang tanan diha sa posibleng transmission sa virus, kini suma ni Mayor Sara Duterte-Carpio.
Suma sa local chief executive niadtong Lunes, Abril 19, atol sa "Special Hour" program sa 87.5 FM Davao City Disaster Radio, nga ang mga business establishments kinahanglan istriktong motuman sa mga Covid-19 regulations sa siyudad human sa taho nga dunay giingong pipila ka mga establisemento ang mipaluag sa ilang minimum public health ug safety protocols.
Gilayong gimandoan sa mayor ang Davao City Task Force Covid-19 Response Cluster nga pakusgan ang ilang inspection sa mga business establishments sa siyudad aron maseguro nga ang mga establisemento mipatuman gayod sa ilang minimum health and safety standards nga gipasunod sa City Government.
Ang safety and health standards sa matag business kinahanglan naglangkob sa pamaagi sa pagbatok sa possible transmission pinaagi sa pagtuman sa minimum public health and safety standards sama sa pagsuot og face masks ug face shields, constant sanitation, physical distancing, ug record-keeping sa mga tawo nga mosulod ug mogawas sa mga establisemento.
Gipahimangnoan sab sa mayor nga ipatuman ang maximum capacity sud sa establisemento ug ang panagtapok sa tawo.
Ubos sa Inter-Agency Task Force Omnibus Guidelines on Implementation of Community Quarantine in the Philippines, ang mga opisina ug mga establisemento nga ubos sa general community quarantine (GCQ) kinahanglan lamang anaa sa 50 percent operational capacity, ug anaa gayod gipatuman ang minimum health standards ug mga precautions.
Ang Davao City ubos sa GCQ hangtud Abril 30, 2021. (Jeepy P. Compio/CIO)