WALAY kabutangan sa kasubo ug kapungot sa pamilya ug kabanay sa usa ka tuig-tulo ka bulan nga bata human kini disgrasya nga nalatayan sa dump truck alas 8 kagahapon sa buntag didto sa Purok 5, Barangay 76-A, Bucana, Davao City.
Subay sa report nga nahipos sa Superbalita Davao gikan sa San Pedro Police Station, giingon nga ang inahan nga si Michelle na-busy sa canteen duol sa nahitaboan samtang ang amahan nga si Ronald namahaw.
Giingon nga gipabantayan ang biktima sa 8 anyos nga ig-agaw niini, apan nalipat sab kini ug wa makabantay nga milakaw diay ang bata padung sa kalsada.
Sa maong higayon, miagi sab ang dump truck ug suma sa drayber niini, wala niya makita nga naa diay bata sanglit habog ang trak.
Dead on the spot ang biktima diin makita sa usa ka hulagway ang paggakos sa kabanay ngadto sa nagkadugo nga bata nga wala nay kinabuhi.
Drayber sa trak gikustodiya na sa kapulisan sa San Pedro police, samtang giandam ang tukmang kaso nga ipasaka didto sa korte.