PAMPANGA

Garcia: Tiltilan Kapampangan (Kapampangan Dips)

Kapisik

“ING ditak mung tiltilan tatakpan na ing dakal a kasalanan.” -- Anthony Bourdain

“Ing mayap a pamagparagul e mangabldugan a e ka manugse tiltilan keng dulang nung e ali mu apansingan nung ating aliwang makagawa kaniti.” -- Anton Chekhov

“Nung ing tau ala yang tiltilan, mangabaldugan a melili ya. Dapot ing taung ita malyari ya namang malili keng tiltilan.” -- Gucci Mane

“Deng dakilang kababaynan ...mengari lang pekamayap a tiltilan... lakwas mayap nung e na pakibalwan nung makananu lang megawa.” -- Octave Mirbeau

“Alang tiltilan keti king yatu nung e ing danup.” -- Miguel de Cervantes

“Mayap pang manaimik namu kesa keng sabyan ing katutwan king marok a sisti, at siran ing sari kanyaman a ulam king marok a titltilan.” -- Saint Francis de Sales

“Paynawa ing mayumung tiltilan ning pamangawa.” -- Plutarch

“E ku pa semutanan ing metung a katutwan king tiltilan ning kalaraman bang mung ayamyam ya iting sauli.” – ‘Marguerite Yourcenar

“Neng masakit ing bye at ing aldo makaba ya, ing pekamasampat a apunan

e apat a pantas a apag, balang metung makababad king tiltilan nung nu ing mala-panilan la lasa a e pa atakman kanita, nung e metung a bage makapayapa at manayaman lasa, saguling malaso - metung a bage a mamye kapanamdaman kaninu man agyang kapenandit mu, a ligtas ya ing ninu man.” -- Laurie Colwin

“Ding indredus ilang tiltilan ning malanging bye.”

***

Nyanyaman ing pamangan nung ating tiltilan. Nung alang tiltilan mekad e ka makapangan masalese. Mekad matabang o kulang lasa at nyaman. Bala mu naman bye magdili-dili ing ulam a alang tiltilan. Ing tiltilan mapalyaring maslam, maparas, malat o mayumu-yumu o pisamut-samut a kaslam, paras, kalat at yumu, misan pati pait sasamut da naman.

Aslam ing pekaburi dang tiltilan deng kabalen. Iti maralas gawa keng sabo sasa, atbu o ungut. Bala buburu da ing sabo bang sumlam dapot e makasakit keng katawan. King kasalungsungan ating mapilang gagawang aslam ing misasamut e likas a sangkap. Panulu mung sasamut da keng danum bang kumaslam inya e mayap king dungus at katawan uling e likas.

Ing metung pang tiltilan da ring kabalen ya pin ing baguk. Asinan da la ring alamang a gagawang baguk bang e la masira at kaybat mekad igisa da la keng kamatis at lara bang kanita lakwas maging malasa.

Alubebe na man ing metung pang tiltilan a mala-baguk mu naman dapot aliwa la gagawang alubebe. Mangalati lang asan ding gagamitan da. Malagad lang kabalen deng gagawang alubebe at ing sabo niti yang magagawang patis.

Burung mangga o kamyas mu naman. Anti king apisabi na kanita ing Kapisik a milabas, ing pamamurung mangga, kamyas o santul bunga lang malapit nang katubasan o agyang malulut la mu, dapot e bubut uling kulang la pa kaslam kanita. Sasamut la king piunyaban king abyas a tutun at palambatan lang atlung aldo bayu la malyaring tiltilan.

Ding taganang tiltilan Kapampangan ila pin ding buru at tagilo. Pisamut asan at pepaslam a nasing tinun ing buru at ing tagilo naman miyaliwa mu ing samut. Malyaring paro o bundalag o mangalating bulig ing samut. Tabalu o’t kaburi da keng atin baung makasdan deng kabalen, ne.

Ding sagiwang santul at matwang sampaluk gagawan da la namang tiltilan at ing samut mu danum at asin. Deng aliwa sasamutanan da lang penadtad a kamatis at asin o patis.

Parati namang atin kareng dulang o lamesa ila ring toyu at patis. Gawa la reting Isik at Apon. Kambe ning asin—deti ring e malyaring ala kareng pibale-bale Kapampangan. Matamle ing pamamangan nung ala kareti. Atin kang tiltilan, abe? O nanu naman ing itiltil mu?

***

Dake Talabaldugan:

mipanabak (pangdiwa) mipate gamit da palang o talibung, mipatadtad. English - fight using sword or bolo. Alimbawa king pamangamit: “Kasalese da pamung misasabi nandin kaybat kabalik ku mipanabak na la pala.”

mipanalambitin (pangdiwa) mipanyalambitin, agnan salambitin king metung at metung, lambalambitin lang miyabe o abe-abe. English - climbing and swinging as partners or playmates. Alimbawa king pamangamit: “Disnan mi lang mipanalambitin keng impun ning baliti reng miyasawang matsing at kabud-abud kabud na la mipate at kaybat ing metung menakbag ya.”

mipanalan (pangdiwa) mitatalanan gamat o aliwang dake ning katawan o aliwang bage. English - holding each other’s hands or other parts of the body or other things together. Alimbawa king pamangamit: “Deng adwang bulag ikit mi lang mipanalan gamat kabang maglakad la keng pilapil.”

mipanalandi (pangdiwa) mipaglampung a pusa o aliwang kaladwan a mipanggayuma bayu la misiping anting miyasawa. English - teasing or enticing each other to have a sexual intercourse. Alimbawa king pamangamit: “Mipanalandi la reng asu keng dalan nabengi inya e kami mekatudtud masalese inya linwal ku bang bulyon la’t itabi.”

***

Sadyang gawi da reng Kapampangan

Deng gagamitan dang palang inyang minuna deng kekatamung kabalen miyayaliwa la. Ating kampit, ating kabasi, lait o kalait at ating panabud. Balang gamit ating lagyu at balang lagyu ding kasangkapan a reti atin lang makatutuk a pigamitan. Ing kampit malati yang palang a gagamitan pangili, pamutut at pamalat. Ing kabasi maralas yang gagamitan da keng ulam; ing lait magagamit yang pamutut bulung sagin, sampaluk, buku, kwayan o aliwa pang mangatas a impun tanaman at ing panabud ya ing gagamitan dang panabtab at pangate. Ing palang yang panglaganas a lagyu karing kasangkapan a pataram a gagamitan king pibale-bale.

Maralas asasali la reti kareng mamandayu neng pyesta karing mamisali ibat Apalit o mekad kareng tau Batangas. Banwa-banwa mamanyatang la reti kanita dapot king kasalungsungan ala nang anti karelang mamisaling kasangkapan pambale.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!