Dear Atty. Joan,
Maayong adlaw!
Ako si Boy, 35 years old. Niadtong Disyembre 2018, nagbuwag nami sa akong asawa. Duna miy duha ka anak nga nagpangedaron og 18 ug 15 anyos. Kasado kami sa huwes niadtong 2003.
Niuli na ko sa among probinsiya human kami nga nagbuwag. Padayon ko nga naghatag og sustento alang sa akong mga bata.
Gusto na unta ko musulod og laing relasyon apan dunay nagtambag nako nga dili kini mahimo kay basin mapasakahan ko og kaso.
Hinuon nagkasinabot mi sa akong asawa nga dili lang mi maghilabtanay sa mga lakaw sa among mga kinabuhi. Gani interesado ako nga magpahimo og kasabutan sa papel kabahin ini.
Posible ba ang maong kasabutan? Kon mahimo kini, pila kaha ang bayad?
Salamat kaayo ug more power sa CLB.
Imong magtatampo,
Boy
Dear Boy,
Maayong adlaw usab kanimo ug salamat sa imong pagsunod niining lindog.
Sakto ang nagtambag nimo nga dili ka mahimong musulod og relasyon samtang minyo pa ka sa imong pares. Posibleng makiha ka og concubinage ubos sa Revised Penal Code o paglapas sa Anti-Violence Against Women and Their Children (Anti-VAWC) Law kon mapamatud-an nga nakigrelasyon ka og lain samtang wala pa ma-dissolve ang kaminyuon nimo.
Maayo pod nga padayon ka sa pagsuporta sa imong mga bata. Kadaghanan sa mga reklamo nga madawat namo diri sa CLB mao ang kakuwang sa child support alang sa mga pamilyang nagbuwag. Usa ka maayong ehemplo ang imong binuhatan, Boy.
Apan sayop ang imong sugyot nga isulat sa papel ang kasabutan nga dili na kamo maghilabtanay sa imong asawa sa mga personal nga lakaw ninyo. Dili kini “legally binding” o nagpasabot nga wala kiniy ngipon sa mata sa balaod.
Gani, dunay mga hukom ang Korte Suprema kabahin sa maong sitwasyon ug consistent kini sa pagpahinumdom nga dili mahimo matugutan ang maong kasabutan kay iligal kini.
Ang angay buhaton nimo mao ang padayon nga pagkonsulta sa mga abogado kabahin sa imong sitwasyon. Posible nga mu-file ka og mga civil cases sama sa legal separation ug nullity of marriage apil na niini nga mahimong basehan ang “psychological incapacity” sa pagwagtang sa inyong kaminyuon.
Sa laktud, kinahanglan sundon nato ang mga lakang nga gilatid sa balaod sa pagputol sa kaminyuon. Dili kita pwede nga muhimo og mga shortcut nga walay basehan sa balaod.
Daghang salamat. Hinaot makahatag kini og lamdag sa imong suliran karon.
Imong alagad,
Atty. Joan
[Lindog sinuwat ni Atty. Joan Saniel-Amit, executive director, inubanan sa mga abogado sa Children’s Legal Bureau sama nilang Jenny Vieve Cabradilla ug King Anthony Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]
Shortcut sa pagbuwag