Maayong sinyales ang pagdagsa sa senior citizens sa Dakbayan sa Sugbo sa unang adlaw sa pagpamakuna batok sa coronavirus disease 2019 (Covid-19) nga gipahigayon sa Robinsons Galleria ug University of Cebu (UC) Banilad campus niadtong Lunes, Abril 19. Gikomirmar ni Dr. Jeffrey Ibones, pangulo sa City Health Department, nga niabot na og kapin 796 ka seniors ang nabakunahan og Sinovac sa duha ka vaccination sites timaan sa pagsalig sa bakuna.
Unang dunay nitumaw nga kabalaka sa negatibong epekto sa bakuna labina sa mga edaran na, apan kini hinayhinay nang napapas tungod sa gipakita nga kasibot sa senior citizens sa dakbayan. Maayong ehemplo kini sa senior citizens sa ubang local government units nga dili magmakuli sa pagpaubos sa pagpaturok sa samang bakuna.
Ang City Government nagtinguha nga nakabakuna og 1,000 ka senior citizens matag adlaw. Ang dakbayan sa adunay 4,600 ka doses Sinovac nga ilang gitagana para sa mga hamtong ug mangayo pa sila og dugang bakuna gikan sa national government. Naka-schedule nga bakunahan ang mga senior citizen gikan sa Barangay Banilad ug Talamban nga adto ipahigayon sa UC-Banilad samtang, ang Basak Pardo, Poblacion Pardo ug Kinasang-an adto sa Robinson Galleria.
Ang Barangay Apas ug Luz adto sa UC-Banilad samtang ang Lorega San Miguel, Hipodromo adto sa Robinson Galleria ug sa SM Seaside City ang Basak San Nicolas. Sa katapusang adlaw, Abril 22, ang Barangay Lahug adto sa UC, Tinago adto sa Robinson ug ang Guadalupe adto sa SM Seaside. Kini gituyo nila og bahin ang area ug depende sa barangay mga duol sa vaccination site aron usab duol ra sa mga senior citizen inig pabakuna.
Ang pagkakritikal sa kabag-ohan dili sayop apan ang pagbaton sa kahadlok nga walay igong gibasehan mas peligro pa sa pandemiya. Naningkamot ang awtoridad sa panglawas aron kita maluwas sa virus nga naghamok sa tibuok kalibotan. Kabahin kitang tanan sa kadaugan batok sa Covid-19.
Ang pagsalig ug kooperasyon dili nato ihikaw labina sa hut-ong senior citizens nga risgo sa pagtakboy sa virus.