SUPERBALITA CEBU

Smart motukod og 5 ka cell towers sa Liloan

GROUNDBREAKING: Nanambong naglakip kanila ni (atubangan, gikan sa wala) Jimmy Chua, PLDT VP and head of Corporate Relationship Management for Visayas; Atty. Maria Jane Paredes, AVP/Center Head, Smart Corporate Communications Group-VisMin; Liloan Mayor Christina Garcia Frasco; 5th district Rep. Duke Frasco; Alexis Winters, Smart regional head for Central, Eastern Visayas; ug Fe Barino, president ug CEO Durosland Properties Inc. / PR

Makapaabot na unya og mas kusog nga internet connectivity ang mga Liloanon kon mahuman na ang lima ka mga cell tower sa Smart Communications, usa niini sugdan na pagtukod sa Barangay San Roque, bukirang dapit sa lungsod.

Mao kini ang gibutyag ni Alexis Winters, Smart regional head for Central, Eastern Visayas, atol sa groundbreaking ceremony nga gipahigayon sa Lunes, Abril 19, 2021 sa Golf and Leisure Estate sa Barangay San Roque nga gitambungan usab sa lokal nga mga opisyal nga gipangulohan ni Mayor Christina Garcia Frasco ug 5th district Rep. Duke Frasco.

Matod ni Winters nga ang matag cell tower LTE capable na ug ma-upgrade ngadto sa 5G ug matag lumolupyo sa Liloan makapahimus na sa mas paspas nga connectivity.

Gawas sa San Roque, mopabarog sila og mga cell tower sa mga Barangay Santa Cruz, Yati, Catarman ug Jubay sa lungsod sa Compostela.

Kasagaran niini moserbisyo sa mga residential ug commercial nga mga dapit. Ang pagtukod sa usa ka cell tower molanat og labing minos unom ngadto sa siyam ka mga buwan.

Ang unang cell tower ibutang sa elevated nga bahin sa Golf and Leisure Estate nga iya sa Durosland Properties Inc.

Si Fe Barino, presidente ug chief executive officer sa Duros, nagpasalamat sa Smart ug kang Mayor Frasco nga gipili ang ilang dapit nga butangan sa unang cell tower kay natukma kini sa ilang plano sa paghimo sa golf course nga pahigayunan og international tournaments sa umaabot nga katuigan kon mahuman na ang pagpalambo sa dapit.

Si Mayor Frasco, sa iyang bahin, nihulagway sa groundbreaking nga “historic day for us” kay nagsugod na og katuman ang iyang saad ngadto sa iyang mga konstituente nga ang matag usa hatagan og access sa internet.

Tungod kay LTE capable sites man ang pangtukuron, segurado di Mayor Frasco nga kalidad nga connectivity ang maangkon sa matag Liloanon.

Iyang gibutyag nga dugay na siyang nanghangyo sa Smart alang niini ug karon, gisanong na siya.

Alang kaniya, ang internet accessibility ug connectivity naapil sa human rights nga di angay ihikaw bisan sa labing ordinaryong lumolupyo, labina niadtong sa kabukiran nagpuyo.

Gawas sa groundbreaking, gitugyan usab sa Smart ang labing minos 200 ka mga LTE pocket wifi, nga matod sa mayor, ilang ihatag ngadto sa scholars sa lungsod. (REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph